Kyllingtid i Uskedalen

Tre dagar før Erna stengte ned skulane, hadde Trine Nødland starta sitt årvisse kyllingprosjekt ved Uskedalen skule. Fredag fekk dei nyklekte nøsta sin heim.

– Eg har gjort dette i snart årevis, og utklekking av kyllingar har vore utgangspunkt for tverrfagleg læring innan ei rad fag, utover berre naturfag. Men i år vart det datakyllingar, seier lærar Trine Nødland om årets kull.

Det betydde at årets nyklekka sjarmtroll var urørte av barnehender fram til fredag. Då vart fem av dei overrekte til fire søsken Hermann-Fossli, og grundig kost med av barnehender frå første sekund.

Familieløft

– Barna kom heim frå skulen ein dag og sa at det må bli no, viss me skal få kyllingar mens me går på skulen, fortel nyklekt hønefar Christoffer Fossli.

Barna det er snakk om, er Ebba (11), Iver (9), Ola (9) og Anna (6) Hermann-Fossli, som bur idyllisk til med elva i Uskedalen sentrum.

– Det stemmer. Barna ropte «Pappa, no må me laga eit hønsehus, for no kjem det kyllingar». Då sa far: «Då må dykk laga middag, slik at eg rekk å laga ferdig hønsehuset», gjenfortel mor Monica Hermann.

– Så det har blitt eit familieløft. Eg har blitt frigjort til å byggja, og så har barna tatt på seg ein del andre oppgåver i mellomtida. I alle fall tidvis, smiler Chris.

– Dei har bidrege meir enn dei pleier, nikkar Monica

Barneflokken på fire går i første til femte klasse, og er meir enn modne til å ta seg av kyllingane. Det er lett å både sjå og høyra når det er tid for fotoseanse. Den byr på intenst med piping frå kyllingane, som blir haldne varsamt i hendene av barna.

– Me vil ikkje at dei skal frysa, seier Ola med litt bekymring i røysta.

– Trine sa at det går bra viss de held dei i hendene, seier mamma.

– Me gler oss! Eg er litt spent på om det er høner eller hanar. Eg skal sjå etter tissen kvar dag, ler Iver.

– Dette blir supergøy, seier Anna.

Nøsta har fått namn òg.

– Mulle, presenterer Ebba.

Pippen blir halden av Iver, Ola held fram Rocks, medan Anna kosar med Crazy.

– Eg trur me har ein Messi også, seier mor og siktar til den femte, den som fekk sleppa fotoseansen i kald friluft.

Pass katten

Barna er definitivt klare for å ta ansvar.

– Me har laga golv i hønsehuset, og hjelpt pappa på forskjellig vis, påstår dei.

Omsut har dei også.

– Me går inn med dei no, før dei byrjar å frysa, seier barna og returnerer til badet der kyllingane enn så lenge lever lukkelege dagar i ei pappeske.

– Husk å lukka att døra, så ikkje katten kjem og tar dei! formanar mor.

– Så de har katt også?

– Ja, apropos å ta ansvar. Den døra må vera lukka, viss me skal ha kyllingar her særleg lenge. Det er veldig sørgjeleg om me ikkje har nokon igjen, seier mor.

Det blir neppe eit problem. Så mykje omsut som desse kyllingane blir vist, er det grunn til å tru at dei blir passa godt på. Og skulle katten koma, kjem berre Messi til å finta han ut likevel.