Kvinnhering i ny dokumentarserie på TV Haugaland

I serien snakkar kjente og ukjente haugelandingar om sine psykiske utfordringar, deriblant Marlene Johnsen frå Halsnøy.

I oktober tok Grenda ein prat med Marlene om deltakinga. Ho fortalte om si psykisk helse og kvifor ho valte å vera med i dokumentarserien «Inni mitt hode».

Open, sårbar og sterkare enn nokon gong fortalte ho om ein krevjande barndom med mykje traume. Ein barndom som råka ho og livet hennar som vaksen. Etter fleire år med psykiske utfordringar, kom ho til eit punkt der ho ikkje ynskja å leva meir. Ho planlagte gravferda si, og gjekk langt inn i skogen for å ta sitt eige liv. Ei melding frå bror hennar redda ho.

– Eg vil med deltakinga mi hjelpa andre som slit med psykisk helse, og få fram at openheit er viktig. Eg unna ikkje min verste fiende å ha det slik. Det er viktig å snakka høgt om det, og strekkje ut ei hand. Det skal ikkje vera flaut å be om hjelp, sa ho til Grenda før innspeling.

Sterk og viktig serie

«Inni mitt hode» er ein dokumentarserie om psykisk helse. Den handlar om det spekteret av kjensler som formar liva våre, og møter med ulike menneske som delar si historie. Ein sterk og viktig serie på 13 episodar, som hadde premiere på TV Haugaland laurdag 7. mai.

– Du må veta at du ikkje er åleine, om du sit hos psykologen. Mange har sete der før, du veit berre ikkje kven det er når du passera dei på gata. Alle har ein psyke, og alle er til ei kvar tid ein stad mellom god helse og dårleg helse. Det kan vera som ein forkjøling i sjela, som vi klarar å lindra sjølv, det kan vera som ein lungebetennelse, som vi treng hjelp til å bli friske frå, skriv TV Haugaland om dokumentarserien.

Halsnøybuen Marlene Johnsen er å sjå i episode 3, 4, 8, 10, 11 og 13.

Sjå den nye serien om psykisk helse, «Inni mitt hode» på TV Haugaland. Det vert lagt ut ny episode kvar laurdag.