Kvinnheradsskulane litt over fylkessnittet
Resultata frå nasjonale prøvar i 5. klassane rundt omkring i landet har kome. Der kjem det fram at Kvinnheradselevane har gjort det betre i engelsk i år enn i fjor.
Femteklassingar i heile landet må kvart år ta nasjonale prøvar i engelsk, lesing og rekning. Det er mange meiningar om effekten av desse prøvane, men målet er å gje kvar enkelt skule eit bilete av korleis det står til med ferdigheitene til elevane deira. Denne informasjonen kan skulen bruka til å vidareutvikla praksisen sin.
Nasjonalt har ein registrert ein liten nedgang i leseferdigheitene frå i fjor. Det vert vidare konkludert med at jenter les betre enn gutar, men at gutar presterer betre i engelsk og rekning.
Annonse
58 poeng i Uskedalen
Resultata frå Kvinnherad viser ikkje noko nedgang i leseferdigheiter. Men ein kan sjå det same mønsteret i kjønnsskilnader som i resten av landet når det gjeld lesing og rekning. I lesing får jentene eitt poeng meir enn gutane, medan gutane får fire poeng meir enn jentene i rekning.
Jenter og gutar gjer det derimot heilt likt, og veldig bra, i engelsk – 53 poeng mot landssnittet på 49 og fylkessnittet på 48. Utan å gå meir inn på skilnadane mellom skulane, kan me godt gratulera femteklassingane ved Uskedalen skule med å ha hanka inn heile 58 poeng på engelskprøven.
Nasjonale prøvar, 5. steg, 2024-25
| Engelsk | Lesing | Rekning | |
| Noreg | 51 | 49 | 49 |
| Vestland | 50 | 48 | 50 |
| Kvinnherad | 53 | 50 | 51 |
Eit verktøy for oss
Annonse
Eva Refvik er rådgjevar innanfor oppvekstsektoren, og sit sjølv og studerer tala når Grenda ringjer. Ho er einig i at det ser fint ut for Kvinnherad, men legg til:
– Dette er først nyttig når ein går inn på enkeltskulenivå. Eg er redd desse prøvane har blitt ein konkurranse i å gjera det bra, når det eigentleg er eit verktøy for oss. Kvart år ser skulane på resultata sine og jobbar systematisk med å avdekka årsakssamanhengar, og utvikla undervisinga vidare.
