Kvinnheradkunstnar på Høstutstillingen

Frå 10. september til 16. oktober skal den tradisjonsrike kunstnarjuryerte utstillinga visast i hovudstaden. Kunstnaren Cato Løland kjem frå Sandvoll, men bur og jobbar i Bergen. I år er han for andre gong antatt til utstillinga, som har som mål å visa nye tendensar på den norske kunstscena.

Løland stiller med dei to verka Bogar i spenn (brun), og Bogar i spenn (raud). Båe verka er skapt utav tekstil, metall og ståltråd, og måler inntil 143 x 36 x 160 cm kvar.

– «Bogar i spenn» vart laga som ein serie på fire arbeid i 2021, men dei er alle individuelle verk. Eg jobbar med utgangspunkt i kontrastar i ulike materialar, der både materialane og verka blir ein manifestasjon av noko kroppsleg, forklarar han.

Kropp i rom

Den rosa versjonen av «Bogar i spenn» er kjøpt inn av Kode i Bergen, medan den grøne er kjøpt inn privat. Alle verka er såleis ute i verda, der dei konfronterer både romma dei eksisterer i, samt dei kjødelege kroppane som oppsøker desse.

Konfrontasjonen er ein innbakt del av verka, der Bogane heng i spenn ut frå veggen i romma dei er stilt ut i. Løland understrekar at deira skulpturelle og fysiske form gjer at publikum må ta stilling til dei i dette rommet.

– Det å vera i spenn kan jo vera ein menneskeleg tilstand, både fysisk og mentalt. Samstundes er verka montert direkte i veggen, der tyngdekrafta gjer at metallet i verka òg kjem i spenn, fortel Løland på telefon frå Bergen.

Kunstnaren sjølv hadde ikkje tid til å reise til utstillingsopninga på Kunstnernes Hus denne helga, men han tykkjer likevel det er stas å vera med i år igjen.

– Det var nok litt større for meg då eg var debutant i 2016, men det er framleis ein spanande arena å stilla ut på, seier han, før han utdjupar kvifor:

Når breitt ut

– Høstutstillingen er sett saman av kunstverk laga av etablerte og uetablerte, kjende og ukjende kunstnarar. Ein treng ikkje vera utdanna for å bli antatt, og det er ligg ein demokratisk prosess bak utveljinga. Dette er jo positivt, men også noko utstillinga blir kritisert for, då det resulterer i ein stor miks både av uttrykk og kvalitet, seier Løland.

Til trass for, eller kanskje på grunn av dette, er utstillinga ei av dei som får mest merksemd i landet, både av media og av publikum.

– Det er mange som får sett Høstutstillingen, og dette er kanskje den eine utstillinga folk går på i året. Med det har den ein viktig funksjon, for stiller ein ut her når ein ut til fleire enn ein gjer med ei utstilling i ein vanleg kvit kube, og det er jo veldig kjekt, slår han fast.

Det er totalt 100 kunstnarar og kunstnargrupper som er representert i årets utgåve.

Juryen som har valt ut desse 100 har bestått av Stacy Brafield, Åsil Bøthun, Marius Moldvær, Gelawesh Waledkhani, Apichaya Wanthiang og Maya Økland. Arrangøren bak utstillinga er Norske Billedkunstnere.

– Kjenner meg heldig og privilegert

Den utflytta Sandvollbuen er elles representert på fleire arenaer om dagen. Mellom anna er han ein av kunstnarane som er utstilt i Kode-utstillinga «Det skeive blikket» i Bergen, som er eit ledd i deira markering av Skeivt kulturår 2022.

– Det er ei viktig utstilling som flest mogleg burde fått sett. Den seier noko om verda vi er i, og noko om korleis verda burde vera, seier Løland, og legg til at «Det skeive blikket» er å sjå ut året.

Fram til 2. oktober er Løland også aktuell med ei utstilling på Tekstilindustrimuseet i Salhus, samstundes som han jobbar fram mot ei boklansering og utstilling på Paris Internationale i slutten av oktober.

– Det er mykje som skjer nett no, men det går veldig smooth. Utstillinga og boklanseringa i Paris er i samarbeid med galleriet Entrée her i Bergen, som er leia av Randi Grov Berger. Eg er i gode hender med ho, og kjenner meg heldig og privilegert, sluttar Løland.

Leiar for Den Nasjonale Jury i Høstutstillingen 2021