Kvinnherad Vekstbedrift: Styreleiaren trekte seg

– Eg og hovudeigar er grunnleggjande ueinige. Saman med styret hadde eg hadde ein plan for korleis me skulle koma ut av det, og gå vidare. Den planen meiner me var den rette for å gå vidare, seier styreleiar i Kvinnherad Vekstbedrift Bjarte Erstad til Grenda.

Han seier vidare at resten av styret også har stilt sine plassar til disposisjon.

Heile styret med seg

– Eg blei henta av kommunen til å vera styreleiar, og når dei då ikkje er einige med meg, så har eg ikkje anna val enn å tre av. Då eg gjekk inn som styreleiar, var eg klar over at det var meir enn eit vanleg styreverv, og at eg og styret som var foreslått kunne løysa oppgåva til det beste for selskapet, seier Erstad vidare.

Det var i samband med styremøtet på torsdag at avgjerda om å fråtre vart tatt av Erstad.

Kvinnherad Vekstbedrift har vore gjenstand for merksemd i fleire rundar i kontrollutvalet sidan før Erstad tiltredde som styreleiar for halvanna år sidan.

– Me fekk rapporten frå Deloitte som kontrollutvalet bestilte, og fann våre verkemiddel for å løysa ut sjekkpunkta som kom som ein konklusjon i den, seier den avgåtte styreleiaren.

På spørsmål legg han ikkje skjul på at det er ordførar Hilde Enstad og kommunedirektør Ragnhild Bjerkvik han har hatt mest med å gjera i si tid som styreleiar.

– Eg er mest usamd med Hilde Enstad. Det er eigarskapsutvalet som er min kontakt her, på lik linje med alle andre selskap som kommunen er eigar av, legg Erstad til.

Eigarskapsutvalet er sett saman av representantar for dei tre største partia, nærare bestemt ordførar Hilde Enstad (Ap) og varaordførar Leif Sverre Enes (H), samt Gunnar Våge frå det største opposisjonspartiet Senterpartiet.

– Det seier sitt når heile styret stiller sine plassar til disposisjon, melder Erstad vidare om styrevedtaket torsdag kveld. Fredag gjorde han det klart at han trekte seg, og oversendte til kommunen at resten av styret stiller sine plassar til disposisjon.

– Eg meiner me har kome langt på veg med jobben me var sett til å gjera, men har ikkje blitt vist tillita til å gjera jobben ferdig, sluttar Erstad.

Stadfestar usjeme

– Eg kan bekrefta det Erstad seier. Me har ikkje vore einige om vegen vidare. Tillita er broten, og det tar styreleiar konsekvensen av, kommenterer Hilde Enstad.

– Kor lang tid har det vore slik?

– Eg trur det er fornuftig at eg ikkje går inn i detaljane, for å unngå uro rundt bedrifta. Me er einige om at me er ueinige, seier Enstad til Grenda.

Ho opplyser at det no er det generalforsamlinga sin jobb å få i hop eit nytt styre.

– Og så skal me vera litt meir presise i forventningane frå eigarane, og ha ein tettare dialog mellom eigar og styre. Me skal koma med ei tydlegare bestilling til styret, då det er der konflikten har vore; Kva eigar har vilja og kva styreleiar oppfatta, legg Enstad til.

Det siste styrevedtaket som vart gjort av styret som no stiller sine plassar til disposisjon, var ei oppmoding om å kalla inn til generalforsamling på kortaste mogelege frist.

– Eigarskapsutvalet hadde eit møte i går (tysdag), og orienterte gruppeleiarar i kommunestyret etterpå. Gunnar Våge er konstituert som ny styreleiar i dette vakuumet som skjer fram til ekstraordinær generalforsamling. Det er viktig for hovudeigaren at Kvinnherad Vekstbedrift har eit nytt styre på plass så raskt som råd, sluttar Enstad.