Kvinnherad SP fekk Twitter-kontoen hacka

– Me har deaktivert Twitterkontoen etter at han vart misbrukt, fortel Hans Inge Myrvold til Grenda.

– Kontoen har ikkje vore særleg aktiv dei siste åra, og nokon har skaffa seg tilgang til han. Det er ein påminnar om at ein må vera forsiktig på nettet, og det er noko ein kjenner til frå Stortinget også, mellom anna. Me blir kursa og påminna om å ta datatryggleik på alvor, forklarer han når Grenda spør om den uvanlege aktiviteten på kontoen onsdag morgon.

Kva som blir forsøkt formidla til følgjarane av Kvinnherad Senterparti sin konto, er ikkje godt og seia, og Grenda har ikkje gjort nokon forsøk på å finna ut kva teikna prøver å seia. Men at det ikkje er av lokalpolitisk art, føler me oss trygge på.

– Det råkar vilkårleg når ein blir hacka. Då eg var ordførar fekk eg via IT-avdelinga til kommunen sjå at det kom mange forsøk på datainnbrot der. Ein må berre vera flink med passord, og gjerne bruka tofaktorautentifisering. Men no er ikkje Kvinnherad SP på Twitter lenger, konstaterer Myrvold til slutt.