Kvinnherad-krefter overtar Flexibridge

Det går fram av ei pressemelding frå firmaet. Pile har alt starta jobben med å løfte selskapet fram att i lyset, etter at det har lege brakk nokre år. Arbeidet med å gjenreisa Flexibridge er godt i gang, og allereie i august meldte selskapet sin ankomst på fiskeri- og havbruksmessa Aqua-Nor i Trondheim, der selskapet nytta tida til å knyta ny kontakt med tidlegare kundar og kjente av selskapet.

Flexibridge har sitt opphav på Haugalandet, der det tid vart stifta rundt år 2000 av tilsette i firmaet Hatteland. I 2004 vart firmaet kjøpt opp av selskapet Steinsvik. I seinare tid har ikkje selskapet drive noko form for aktivt sal, og produkta har såleis berre vore levert til nokre trufaste kundar. Produktrekka består i hovudsak av arbeidsstasjonar og komplette bruløysingar for navigasjon, operasjon og kontroll på brua.

– Mykje av jobben har bestått i organisering av delelager og systematisering av produksjonsteikningar, men det har også vorte tid til litt kundekontakt. Allereie i fyrste samtalen med tidlegare kunde av Flexibridge fekk eg kjensla av at dette er eit selskap som er sakna av kundane. Historikken til selskapet er rett og slett imponerande, og det å få ta leiing i dette nye kapittelet i Flexibridge si historie er ei oppgåve eg ser på med stor iver og godkjensle, seier Pile i pressemeldinga.

Selskapet skal ha forretningsadresse på Bogsnes, og har Fonna Vekst med på eigarsida.

– Fonna Vekst vart stifta sumaren 2021 av ei gruppe investorar frå Kvinnherad som har det til felles at dei ynskjer å skapa aktivitet i lokalsamfunnet basert på si lange erfaring frå maritim bransje, går det fram av pressemeldinga.

Flexibridge har Styrk Bekkenes som styreleiar. Elles i styret er Noreq- og Harding-kjenningar som Alf Eidsvik og Bjørn Sturle Hillestad på plass.