Kvinnherad kommune med på prøveprosjekt

Dette fortel sektorleiar for omsorg, helse og sosial Åslaug Brænde torsdag føremiddag under eit prosjektseminar om velferdsteknologi og digitalisering i Rosendal.

– Fyrst og fremst så sparar dette pasientar for lang reiseveg til Stord, og me kan fylgja dei opp i eigen kommune ved hjelp av kamera og lokalt tilsyn. Me tykkjer jo at det er veldig kjekt å ha dette samarbeidet både lokalt med nabokommunar og regionalt med DigiVestland, seier Brænde.

– I tillegg så har me også vore i samarbeid med Folkehelseinstituttet, noko me har lært veldig mykje av. Dette er nok måten me må jobbe på framover, det er å jobba i nettverk, jobbe med å utvikla morgondagens verktøy for morgondagens praksis. Me vil sjå korleis me systematisk kan jobbe for å tetta gapet i høve mangel på kunnskap på våre system, og korleis me kan forankra det endå betre i organisasjonen, fortset ho.

Mange sider

Med på prosjektseminaret var representantar frå Kvinnherad kommune, Ullensvang kommune, Sogndal kommune, Vestland fylkeskommune, Høgskulen i Vestland, Fagskulen, AOF, DigiVestland og Folkehelseinstituttet.

– Det me har gjort i dette prosjektet trur eg er kjempeviktig for resten av landet. Det syner at Norge som nasjon kan spare mykje på dette, men kostnadane for kommunen aukar, gevinstane ligg hovudsakleg hjå helseføretaka, forklarer Kåre Birger Hagen fagdirektør hjå Folkehelseinstituttet.

– Dersom ein då gonger dette med talet på kommunar og sjukehusbesøk i Norge og ser på kva dette ville bety, så syner det på sett og vis at det er eit stort innsparingspotensiale, og at finansieringsmodellen må endrast. Det er god grunn til å tru at dette er ei klar forbetring for pasientane, som kanskje er det viktigaste, seier han vidare.

Per Vårdal frå DigiVestland, som er ein av dei som var med å starta heile prosjektet, fortel at jobben med digital utvikling i helsetenesta har mange sider, både tilsettesida, brukarsida i tillegg til kostnadssida.

– Alle desse tinga jobbar me med, både opp mot regionale og nasjonale myndigheiter. Hovudutgangspunktet er jo at det skal vera nyttig for dei som er pasientar. Pasientane i seg sjølv har ikkje så stor interesse for kven som betalar for gildet, men me ser jo at dei ikkje vil reisa frå ytterkantane i kommunen og heilt til Stord dersom dei kan la det vera, fortel Vårdal.

– Så lenge dei likevel får ei like bra teneste, så vel dei heller det. Det er sånn tankegangen er, så kjem kostnadsbiten og alt dette administrative som me må rydde i, fortset han.