Kvinnherad godt representert under Gatebil 2024
Førre helg gjekk Gatebilfestivalen på Rudskogen av stabelen med ein god gjeng frå Kvinnherad på startstreken.
Med åtte bilar til start og nærmare 40 bilinteresserte kvinnheringar til stades, var vestlandskommunen vår godt representert under den årlege festivalen.
Ein av dei var Ronny Teigen, som blant andre hadde teke turen saman med sonen sin Mathias Teigen og bror sin Kjetil Teigen.
Annonse
Yngste nokon sinne
– Me reiste tidleg ned denne gongen, og var allereie på plass for å rigga oss til på onsdagen. Torsdagen gjekk med til førebuingar og litt service på bilane for å få dei godkjende, før treningane byrja på fredagen. Så var det løp både laurdag og sundag, forklarte Teigen.
Gjennom helga var Kvinnherad-gjengen med på to ulike løp, eitt av dei var løpet Gatebil ekstrem.
– I det løpet hadde me som sagt åtte bilar med. Det er på mange måtar Skandinavias råaste, fordi det ikkje finst nokon grenser på effekt. Der er det bilar med alt i frå 250 hk til 1500 hk som køyrer i lag. Dei mest ekstreme bilane kjem ofte ikkje i mål, dei er alt for uføreseielege gjennom løypa, fortsette han.
Annonse
– Det var også to som stilte til start i det som heiter «Straightline», i tillegg hadde me to bilar med på utstilling, la han til.
Kvinnheringen som gjorde det best på resultatlistene var valebuen Sverre Johan Lundal som under Gatebil ekstrem-serien enda med både ein 3. plass og ein 4. plass.
Ein annan deltakar som var med i ekstremserien var Ronny Teigen sin 15-år gamle son, Mathias. Han var blitt spesielt invitert med på billøpet, og vart med det den yngste deltakaren nokon sinne.
– Til vanleg køyrer han berre i Racing NM GT4, men vart i år invitert med. Det er vel slik det blir når ein har vore med i 20 år og dei ynskjer å rekruttera fleire yngre deltakarar. Han får rett nok berre køyre med 245 hestar, men klarte å henga godt med og låg omlag midt i feltet. Det var også rekordmange bilar påmelde i år, fortalde Teigen.
– Kva sa han sjølv om den opplevinga?
– Han syntest det var veldig kjekt og givande, og ikkje minst kjekt å få køyra i lag med alle desse andre. Sjølv om det også var frustrerande når alle andre med fleire hestar drog i frå, og han måtte kniva med bilar som hadde dobbelt så mange hestar, sa Teigen.
Annonse
Heile atmosfæren
Gatebiltreffet på Rudskogen er berre eitt av fleire slike treff som blir arrangert gjennom heile sommarhalvåret. Teigen forklarer at sjølv om det er Rudskogen som er hovudtreffet, så er det ofte gjerne fleire deltakarar på dei hine treffa.
På spørsmål om kva det er med desse treffa som gjer at dei villig dreg land og strand rundt for å delta er svaret enkelt.
– Det er heile atmosfære, og det er eit veldig godt samhald mellom konkurrentane. Alle er positive og vil det besta for kvarandre. Dersom nokon øydelegg bilen sin, så prøver dei andre å hjelpa, understrekar Teigen.
– I tillegg så er det alt i frå showkøyring og bilutstillingar til mykje folk og «aftertrack» med kjente band og artistar. I år var me dessverre veldig uheldig med vêret, og det kjendest meir ut som haust enn sommar. Men det får ein ikkje gjort så mykje med og må berre gjere det beste ut av det, la han til avslutningsvis.
