Kvinnherad får passkontoret tilbake
Torsdag fekk dei lokale toppane for regjeringspartia ei gladmelding av ein budsjettlekkasje: Kvinnherad for tilbake passkontoret.
Publisert
Sist oppdatert
I fleire år har me måtta reisa til Odda eller Stord for å skaffa oss pass og ID-kort. Til neste år blir det råd å få på heimebane når Kvinnherad blitt ein av 15 stader i landet som får oppretta passkontor. Lange avstandar til næraste passkontor er grunngjevinga for at det blir reetablert passutskriving ved Kvinnherad politistasjon.
– Me blei kontakta av Ada Arnstad på Stortinget med nyhenda. Dette er ein gladsak for Kvinnherad og Husnes, seier Veronica T. Thorsen og Thea Vaage om budsjettlekkasjen.
Annonse
Avstandane gjer det svært krevjande for dei som er avhengige av kollektivtransport for å koma seg til og frå passutskrivinga. Samtidig krev det fleirfaldige timar fri i arbeidstida av begge foreldre om nokon under 18 skal ha pass.
– Dette er kjempepositivt, både for eldre, yngre og foreldra til dei unge, slår Vaage og Thorsen fast.
Kvinnherad politistasjon har mannskap til å ta seg av passdelen, men vil trenga ei oppgradering på utstyrssida, er Vaage og Thorsen blitt fortalt. Duoen veit ikkje eksakt når ein vil kunna stilla seg i passkø i Kvinnherad igjen.
– Men sidan det er ein lekkasje i samband med 2024-budsjettet reknar me med at det er meininga at tenesta skal opp og gå i løpet av neste år. Dette er veldig bra for lokalsamfunnet å få det tilbake, sluttar Thoresen og Vaage.
