– Kvinnherad er eit mikrokosmos av det me alle må få til

Etter at klima og miljøminister Espen Barth Eide hadde snakka til konferansedeltakarane, tok han seg tid til ein kjapp prat med pressa også.

– Kor viktig er det å koma til Rosendal og snakka med denne konferansen?

– Eg set stor pris på å få koma til Rosendalsveko og snakka med det som er eit av dei leiande forskingsmiljøa i landet på klima, som Havforskingsinstituttet og Bjerknessenteret er. Men også næringslivsaktørane og kommunane er viktige brikker i den store heilskapen, som er korleis ein skal bli eit meir berekraftig og klimavenleg samfunn, og samtidig tena pengar og skaffa jobbar på det, sa Espen Barth Eide til Grenda.

– Den gode nyhenda er at desse tinga går betre og betre i saman, la han til.

Kvinnherad viktig

Klima og miljøministeren påpeika at når bedriftene rundt i Kvinnherad klarer å laga varene sine med lågare utslepp, så gjer dei ein viktig innsats i å få ned klimautsleppa i Norge, men dei førebur seg samstundes på vera der i framtida, i konkurranse med dei som kanskje har høgare utslepp og blir prisa ut av marknaden fordi karbonprisane blir så dyre.

– Då er det viktig å vera her på Rosendalsveko, og fordi der sameinar akademia og organisasjonar, lokal og nasjonal politikk og næringsliv, argumenterte han.

Innbyggjarane i Kvinnherad gjer i så måte ein viktig jobb i miljøsamanheng.

– Til dømes har Eide Fjordbruk har som mål om å bli eit heilt berekraftig oppdrettsselskap, noko som er krevjande og ambisiøst å nå, men dei er på god veg til å finna løysingar på det. Dei vil etterlata seg minst mogeleg fotavtrykk på naturen, og samtidig produsera sunn mat folk kan eta, eksemplifiserte klima og miljøministeren.

– Ein kraftkommune som Kvinnherad er ein viktig bidragsytar til grøn energi, og industrien i området driv med mindre energi. Kvinnherad er eit mikrokosmos av det me alle må få til, vurderte statsråden.

Smartare

Ein viktig bodskap er at klimaomstilling ikkje først og fremst er å slutta med noko, men å byrja med noko anna.

– Eigentleg er det mest interessant kva me må gjera i staden. For me skal ha det varmt i stova og me skal reisa frå A til B, og me skal produsera varer og eta god mat i eit klimavenleg samfunn. Ein skal ikkje slutta med økonomi, men me skal gjera det på ein smartare måte enn før, understreka Barth Eide.

Han var ikkje i tvil om at det må endring til frå mange.

– Fleire feriar i Thailand i året går ikkje i hop med å berga klimaet. Eg vil ha det varmt og behageleg i stova mi, men eg er ikkje opptatt av å bruka mest mogeleg energi. Det er ikkje slik at eg har det betre viss det er 40 grader i stova i staden for 22 – truleg tvert i mot, men god isolasjon, triple vindauge og smart energibruk gjer at eg kan få den same gode kjensla som før, men med langt mindre fotavtrykk enn før, sa han og overførte det til transport.

– Eg er nøgd så lenge eg kjem meg dit eg vil på ei fornuftig tid. Det er ikkje slik at eg må ha utslepp for å vera nøgd, illustrerte klimaministeren.

– Me må vera ærlege på at det må bli annleis, men det er ikkje slik at det må verta verre. Føremonnen er at du får reint hav og frisk luft på kjøpet, smilte han.

Krig og pandemi

Krigen i Ukraina vart eit av bakteppa under konferansen, til liks med pandemien ein vonleg har lagt bak seg.

– Du må hugsa på den lange krisa i den korte. Overgangen til grønare energi er endå viktigare no med krigen i Ukraina, for det dempar Putin si innflyting på Europa og verda. Samtidig er det slik at skal du ha med deg folket på det lange løpet, så må dei ha det greitt undervegs også, og til dømes ha det varmt i stova si i vinter, illustrerte Barth Eide.

Krig og pandemiar er frykteleg forstyrrande for å få dette til, meiner ministeren, som påpeikte at mange brukte pandemien betre enn Norge til å få fart på den grøne omstillinga.

Han kom også inn på at det er veldig mykje godt engasjement blant dei unge.

– Og dei har rett. Dei gamle gubbane tar feil, og dette er ein alvorleg krise som må løysast. Ein må erkjenna at det har gått for treigt til no. Det er no mange fleire i næringsliv, organisasjonsliv og politikk som ynskjer å ta grep og gjera noko med det. Deira jobb er å halda trykket oppe for at det skal gjerast. Det er mogeleg å gjennomføra kutta, men det krev sterk evne til å stå i det for å koma i mål, slutta Barth Eide.