Kvinnherad Arena måtte stengast: Treningar og kampar avlyste

Torsdag ettermiddag gjekk det ut melding til føresette i appen «Spond» om at Kvinnherad Arena er stengt fram til måndag.

Dette vil seie at alt av treningar torsdag til måndag vert avlyste.

– Ikkje berre det, vondast er det med dei åtte handballkampane vi skulle ha i helga. Eg har måtta ta nokre tunge telefonar i dag, seier ein litt oppgitt kulturleiar Daidalos Dahle over telefonen.

Grunnen til stenginga er at naudlyssentralen, som skrur på naudlysa viss straumen går, har ein batterifeil som gjer at den ikkje fungerer.

– Det er bestilt nye batteri, men desse får vi ikkje før måndag, fortel Dahle.

Teknisk ansvarlig ved arenaen har vore i kontakt med brannvesenet, og saman har dei funne det best å stenga heile arenaen.

– Tekniske feil rår vi rett og slett ikkje over. Vi har verkeleg prøvd alt vi kan og tenkt ut alternative løysningar, men det er ingenting vi kan gjera med det nett no, seier Dahle og legg til;

– Vi kan diverre ikkje opphalda oss i arenaen. Det går på tryggleiken.

Tidligast opning av arenaen er på måndag.