Kvinnherad Arena kan stå ferdig sommaren 2023: – Eit framtidsretta vedtak

Alle partia i kommunestyret gjekk inn for å byggja Kvinnherad Arena, men det vart fremja fleire forslag til endring av kommunedirektøren si innstilling. Jostein Saghaug (MDG) ynska eit punkt om solcelleanlegg, medan Ap, SF og Sp er uroa over det høge driftsnivået som følgjer med idrettshallen. Dei bad administrasjonen kartleggja modellar som sikrar eit tenleg og rasjonelt driftsopplegg.

Også Høgre gjekk samla inn for bygging.

– Dette kjem til å bli eit stort løft for heile Kvinnherad, og eit samlingspunkt for unge og vaksne. Men vi vart gjerne litt betenkte då vi såg overskridingane. Kommunen har difor noko å læra av prosessen, som har ført til ei kostnadsoverskriding som ikkje har vore heilt bra, sa Knut Johannes Helvik.

Ikkje Fjelberg kraftlag

Høgre ynska imidlertid ikkje å bruka pengane frå salet av Fjelberg kraftlag til å finansiera Kvinnherad Arena.

– Vi er av den oppfatning at inntektene frå Fjelberg kraftlag-salet er ekstraordinære inntekter, og dei skal vi bruka til ekstraordinære tiltak i ei ekstraordinær tid, sa Helvik, og rådde til at desse 18,8 millionar kronene heller skal brukast til koronatilskot, eller tiltak som kan få ungdomen til å bli i Kvinnherad. Idrettshallen ville han finansiera med låneopptak eller unytta investeringsmidlar.

Erling Niclasen (H) heldt det mest filosofiske innlegget i debatten.

– Eg synest namnet er så fint. Kvinnherad Arena fortel meg at den er like mykje min på Seimsfoss, som dei som bur på Hatlestrand, Husnes og Halsnøy. No kan vi drøyma om rockekonsertar, eit fantastisk symfoniorkester og landskamp i handball, sa han.

Under eit gruppeleiarmøte vart forslaga til både MDG, Ap/SF/Sp og Høgre teke omsyn til. Dermed vart det gjort eit samrøystes vedtak.

– Dette er veldig framtidsretta på alle måtar. Gratulerer, alle saman. Og så rettar eg ei særskilt takk til Sparebankstiftinga for deira bidrag til å realisera hallen, oppsummerte ordførar Hans Inge Myrvold (Sp).

Vedtaket:

Det endelege vedtaket ser slik ut:

1. Kvinnherad kommunestyre vedtek ny kalkyle på 134,5 millionar kroner eks. mva.

2. I tillegg til tidlegare løyvde kommunale midlar og ekstra kommunal løyving i kommunestyrevedtak 18.02.2021 på 7 millionar kroner eks. mva (omfordelte midlar), løyver kommunestyret ytterlegare 8,8 millionar eks. mva. Manglande finansiering er etter dette kalkulert til 10,0 millionar eks. mva.

3. Kommunedirektøren og styringsgruppa skal arbeida vidare med å skaffa auka ekstern finansiering på 10 millionar eks. mva. Kommunestyret forskotterer dette beløpet.

4. Totalsum 18,8 millionar skal finansierast ved låneopptak/unytta investeringsmidlar, og vert å innarbeida i budsjettrevisjonen 2021.

5. Kommunedirektøren får fullmakt til å inngå kontrakt med Leigland Bygg AS om bygging av Kvinnherad Arena. 6. Kommunestyret er uroa over det høge driftsnivået som blir utløyst i samband med Kvinnherad Arena, og bed kommunedirektøren kartlegga og koma tilbake til kommunestyret med ein driftsmodell som inkluderer idrettslag og brukarar, og sikrar eit driftsopplegg som er mest mogleg tenleg og rasjonelt. Ein slik modell skal også omfatta byggtekniske tilhøve som gjev varige driftsfordeler, til dømes fjernvarme, solcelleanlegg, solfangarar med meir.

7. Kommunestyret legg til grunn eit behov for tydelegare retningsliner i samband med planlegging og gjennomføring av idrettsanlegg, med sikte på ein felles modell for blant anna finansiering og drift av anlegg.