– Kvifor er det den som blir utsett for vald som må gå med alarm?

– Temaet er dessverre høgst aktuelt, då spesielt med tanke på alle drapstilfella me har sett så langt i år. Det er viktig for oss å ta dette opp, sjølv om det ikkje akkurat er verdas mest enkle og lette tema å prata om, fortel komitémedlem Elisabeth Croles.

Komitéen for 8. mars-arrangementet består av Elisabeth Croles, styremedlem i Kvinnherad AP Hilde Enstad, leiar for Kvinnherad SV Silje Nordtveit Olsen, LO-representant Lise Rørvik og kvinnekontakt i AP Vibeke Fredheim.

Omvendt valdsalarm

Kvinner og vald i nære relasjonar har på nytt kome i søkeljoset etter at heile 14 drapssaker har skaka landet vårt berre sidan nyttår.

– Framleis er det veldig skambelagt å snakka om akkurat dette, kanskje også for dei som utøver vald, og i alle fall for dei som opplever det og som kanskje må forklare kvifor dei dett i trappa to gonger i veka. Skamma er framleis stor, og berre det er grunn nok til å ta dette opp i det offentlege og snakka om det, understrekar Croles.

Komande fredag stiller difor Aase Borgen Haktorsen og Solveig Hjelmeland Olsen frå sinnemeistringskurs ved Valen sjukehus, samt Are Uppheim frå politiet i Kvinnherad, for å prata om nettopp dette; Kvinner og vald i nære relasjonar.

– Me veit at det finst her, blant oss. Eg kan i alle fall relatera til min oppvekst der me alle visste kven som ikkje hadde det greitt heime, men det var ingen som snakka høgt om det. Eg trur nok at det er litt slik endå, at det som skjer innanfor husets fire veggar det blir der. Difor er det viktig at me snakkar om det, at det finst og at det finst hjelp å få. Kanskje er det å koma hit og høyra på Are Uppheim no på fredag til hjelp for nokon, seier Enstad.

Blant anna skal Uppheim snakka om lovene og korleis dei har endra seg i løpet av dei siste tjue åra, samtidig tykkjer SV-leiar Olsen at det skal bli interessant å høyra med politiet når det gjeld fleire ting også.

– Både AP og SV er veldig opptekne av bruken av omvendt valdsalarm, det er noko som me har fremja mykje, og dette er nok også noko som Are (Uppheim, journ.merk.) kjem til å koma innpå. Kvifor er det slik at det er den som blir utsett for vald som skal gå med alarm, kvifor er det ikkje den som utøver? spør Olsen oppgitt.

– Ein har også sett døme i media no på at det er enkelte politidistrikt som ikkje har nok alarmar til alle som treng, og som av den grunn då ikkje får. Det er noko med fokuset, kor stoggar det hen, kor er flaskehalsane? Me godtek ikkje at det er der det stoggar, legg ho til.

Heller applaudert

Det kjem også til å bli halde ein appell av ukrainske Nataliia Khomenko der ho blant anna tek opp korleis det er i Ukraina no og korleis det er å vera flyktning.

– Me veit at vald mot kvinner blir brukt som våpen i krig, og at det av og til blir brukt veldig strategisk. Me har sett det i Ukraina og me ser det i Gaza. Når det vert krig er det hovudsakleg kvinner og barn som er mest sårbare og utsette, fortel Croles.

Dei engasjerte kvinnene håpar at flest mogeleg, både menn og kvinner, vil ta turen til biblioteket denne dagen.

– Det er på ingen måte nokon som skal erkjenne noko som helst på fredag, men me vil ha tilgjengeleg oppslag til ulike telefonnummer ein kan ringa dersom ein går heim etterpå og ynskjer å be om hjelp. Og dersom du er mann og ynskjer å koma så er du sjølvsagt hjarteleg velkomen til det, ingen menn vil bli snudd i døra, understrekar Enstad.

– Ja, det er nok snarare tvert i mot, dei ville nok heller blitt applaudert. No er det jo eit veldig alvorleg tema me belyser, og me gjere det i lag med andre, noko som kan vera vanskeleg for mange. Men me håpar jo at me treff flest mogeleg med dette, avsluttar Olsen.