Kvasse klassequizarar på Husnes
Torstein Bjelland, Thea Emilie Vatterdal Markhus og Martin Totland raska med seg heile 11 av 12 mogelege poeng då Husnes ungdomskule deltok i NRK sin Klassequizen.
Publisert
Sist oppdatert
Opptakten til NRK-deltakinga var quiz med alle klassane på Husnes ungdomskule for eit par veker sidan. Alle tiandeklassingane var med på den quizen, og så sette ein saman laget utifrå resultata av den.
Førre måndag var NRK på tunet og gjorde opptak. Der måtte elevane gjennom ei spørsmålsrekkje som spente frå sportsspørsmål og ordtak og geografi til sport.
Annonse
– Det var tøffe spørsmål, men me klarte jo det aller meste. Det me bomma på var kva grein Kjetil Aamodt Kilde tok sølv i under OL i Beijing i år. Me svarte slalåm, men han tok medaljen i kombinasjonen, fortel dei.
Delt førsteplass
11 poeng er delt topplassering så langt i haust, saman med to andre skular. Førebels er det 12 skular som ikkje har vore gjennom spørsmåla. Dei fire beste i Hordaland går til ein finale, før den beste av dei blir sendt til Oslo og landsfinalen der, der det blir brukt dei gamle fylka som fordeling.
Kvinnherad-skulane har levert litt blanda drops i år. Rosendal klokka inn ti poeng, medan Hatlestrand henta heim sju. Øyatun fekk det tøft, med tre av tolv poeng.
Annonse
– Dei fekk veldig vanskelege spørsmål, syns Torstein.
– Det viktigaste er at me er best i kommunen, meiner trioen, men ambisjonane strekk lenger enn berre kommunen.
– Me satsar på å vinna heile greia, seier dei offensivt.
I tilfelle nokon av dei tre andre må kasta inn handkledet, har dei med seg Tuva Olderkjær som kompetent reserve.
– Det var gøy og spennande å vera med på noko slikt, og få sjansen til å visa seg fram og visa kva me kan. Og 11 poeng er jo veldig bra, sluttar Martin, Torstein og Thea Elise.
