Kvardagsmagi på Harry Potter-dag

– Me har laga buttons, trekt og pynta tryllestav, fortel Nadira Zekrie (9) frå Husnes.

– Eg har gjort det same, og no held me på med ein liten quiz, legg Maria Offerdal (8) til, også ho frå Husnes.

Dei sit under eliksir-bordet og jobbar med quizen, men dei viser blidt fram buttonsane dei har laga og tryllestavane dei har dekorert. Hendene deira ber vitne om at dei har vore kreative den stunda dei har hatt på biblioteket.

– Det har vore veldig kjekt, smiler veninnene.

Ingvild Sandvik er ein av bibliotekarane som smilande svinsar rundt i eit flott kostyme.

– Eg trur det må ha vore 70 ungar innom i dag, pluss foreldre, fortel ho.

Det første som hendte då dei opna dørene til Harry Potter-dagen var å dela barna inn i dei ulike Harry Potter-husa. Enkelte hadde gjort det tydeleg kva hus dei ynskte å tilhøyra ved å kle seg ut før dei kom.

Stor aktivitet

Sandvik las frå bok nummer to, og det vart kasta brev frå hemsen kor ungane kunne vinna ulike premiar; notatbøker, tekstilnett, illustrerte kort frå Harry Potter-universet og bøker. Forsamlinga haldt på å roa seg ned til filmvisning då Sandvik viste fram dei ulike premiane og fortalte om suksessen.

Men sjølv om filmen snurra på lerretet i biblioteket var det framleis aktivitet ved enkelte av postane.

På lego-bordet sat Pernille Marie Syversen (12) og Elias Hjelmeland Bjelland (12), begge frå Herøysundet.

– Dette er som i barndommen, sa Elias, medan han plukka i legobitane han hadde framføre seg på bordet.

– Ja, eg òg likar lego, men fantasien er «non existent» på legobygging om eg ikkje har teikningar å bygga etter, la Pernille til.

– Korleis er det å nytta haustferien på denne måten då?

– Det har vore ein kjekk dag, mente Pernille.

– Ja, det er iallfall mykje betre enn å sitja heima, la Elias til.