Kvardagsfilosofi og observasjonar – ny bok frå Aasmund Taarn Sande

«Frakken til Paul, og andre historier» er nummer tre i rekka av petit-samlingar frå Sande. Journalisten er godt kjent for dei fleste kvinnheringar som forfattar av spalta «Paa Tampen» i Kvinnheringen. Sjølv om han er pensjonert, leverer han framleis petitar til avisa annankvar fredag.

– Her får ein kvardagsfilosofi og observasjonar kring livet i Handelandssekjo. Der er hjort og rådyr, og ein evig kamp mot inspektørane i fiskerioppsynet som burde lata folk få ha reiskapen sin i fred, smell det frå Sande. (Red.: Det vart brukt eit anna ord enn «inspektørane» då denne replikken vart ytra.)

Vikinghøvdingen på Snilstveitøy

Nokon tekstar handlar om kva Sande opplever når han er ute på reise, andre tek for seg betraktningar frå dei såkalla «vaffelkameratane».

– Me er ein gjeng på tre karar som har møte kvar måndag der med steikjer vaflar, drikk kaffi og har litt portvin attåt. Då snakkar me om livet i sin alminnelegheit.

I den siste boka, har Sande samla petitar frå dei siste fire åra. Nokon av dei er litt omarbeidd, og gjerne blitt litt lengre enn dei var då dei stod på trykk i Kvinnheringen. Sande kan også opplysa om at han har «brekt» boka sjølv, altså sett opp kvar side og bestemt korleis alt skal sjå ut.

– Eg er utdanna typograf, før eg vart journalist, så eg har litt bakgrunn med slikt, seier han.

Tittelen på boka er henta frå petiten om den gamle sjømannen Paul Skorpen, og ei historie han hadde. Sande fortel:

– Paul Skorpen var vel ein av dei mest særmerkte kvinnheringane i si tid. Han var vikinghøvding på Snilstveitøy, og han var sjømann. Han kunne fortelja om ein førstereisgut som kom om bord i båten oppløyst i tårer etter å ha vore i land.

Historia om Paul inneheld pikante antydingar om ei «gledesstove» i ei hamn ein gong, og ein bortkomen frakk. Lesarane får nyta skildringa på eige initiativ.