– Kva styrer matprisane, og kva kan me forbrukarar gjera?

Det er bondelaga i Kvinnherad, og Kvam samt Kvinnherad Bonde og småbrukarlag og Kvinnherad kommune som skipar til møtet onsdag kveld.

– Det er eit møte for folk flest, for dei som er opptatte av mat og bryr seg om mat. Mat er noko me treng heile dagen, seier Kjetil Mehl på vegner av arrangørane.

Føredraget er ved Anders Nordstad, som er siviløkonom, tidlegare råvarehandlar, generalsekretær i Norges Bonde- og småbrukarlag, skribent og meningsytrar.

– Prisen blir klaga på, men kven er det som bestemmer prisen me betaler? Det er kundane som burde fortelja butikkane kva mat me vil ha og kva pris me vil betala, men no er det kjedene som bestemmer kva me skal eta og til kva pris, påpeikar Mehl, som gler seg til å høyra Anders Nordstad

– Han har innsikt i heile kjeda, frå bonde til bord. Har jobba som råvarehandlar, både her heime og i Europa. Rentekostnadane går opp, men prisen på mjølka og kjøtet heng ikkje i hop med renta. Det er i ferd med å bli krevjande for mange bønder no, meiner Mehl.

Prisauke

Føredraget heiter «Det er maten VÅR, for pokker!» og handlar i følgje Nordstad sjølv om mat, politikk, makt og pengar.

– Er me sjølvforsynt med mat i Norge? Nei, meir enn 50 % av maten me et kjem frå utlandet. Er det bra, når me kan produsera mykje meir av vår eigen mat, i eige land? spør Mehl retorisk.

Føredragshaldaren har stort fokus på å synleggjera for forbrukaren kven han meiner har makta i matvarebransjen.

– Kvifor får bonden så liten del av det matvara kostar i butikken? Eit nyleg døme han skreiv om, er prisauke på norske tomatar. Bonden har fått auka prisen med 4 prosent siste året. I butikken har salsprisen auka med 35 prosent, poengterer Mehl når han omtalar det komande føredraget.

Kvar pengane vert av, skal Nordstad prøva å gje svar på i Rosendal Samfunnshus onsdag.