Kutta fiberkabelen og opna bygget

Den snart 19 år gamle bedrifta spanderte torsdag på seg offisiell opning av deira nye lokale, og spanderte samtidig kake, kaffi og pølse på alle som tok turen. Og det var ikkje få, kunne dagleg leiar Gunnhild Hillestad nøgd konstatera alt før opningsseansen starta.

Blant dei inviterte var alle bebuarane i seniorsenteret, eller naboane om ein vil, eigarane, utbyggjarane og elevane ved elektrolinja på Kvinnherad vidaregåande.

Flytting måtte til

Å flytta ut av leigde lokale i det som har vore hjarta til Kvinnherad Energi og seinare BKK/Wattn, har pressa seg fram over tid.

– Me hadde for lite plass der me var, men flyttinga skjedde kanskje raskare enn me hadde tenkt, og det skuldast blant anna leigeavtalen. Me merkar allereie god effekt av flyttinga, det har vore eit viktig steg, mellom anna på grunn av datasentera våre, sentrumsnoden som mellom 500 og 1000 kundar her i Husnes-området skal knytast på, forklarte Hillestad før opningsseansen starta.

Kvinnherad Breiband eig heile etasjen som dei no held hus i, og tel etter kvart 14 tilsette, inkludert to lærlingar. Dei to lærlingane, Oskar Kaldestad og Rick James Turner, var snorberarar då fiberkabelen skulle kuttast som symbol på den offisielle opninga.

Den jobben var sett vekk til styreleiar Gunnar Våge, som mellom anna forklarte at det er 19 år sidan Kvinnherad Breiband vart etablert.

– Selskapet har sidan oppstarten halde til i leigde lokale hos Kvinnherad Energi i Dimmelsvik. Når barnet er i slutten av tenåra, så er det på tide at det får seg sitt eige hus, sa styreleiar Gunnar Våge i sin tale til dei frammøtte.

– Eg er sikker på at eg har heile styret med meg når eg seier at me er stolte av det me ser her i dag, og me gler oss i dag med de til sette som endeleg har fått ein arbeidsplass som står i stil til den flotte jobben de gjer, skrytte Våge før fiberkabelen – om enn noko motvillig – gav etter for avbitartonga han hadde fått låna for høvet.

Nøgd lærling

Gunnhild Hillestad opna dørene, og inn rann det med nyfikne. Dei fekk vandra fritt i dei nye lokala, med unnatak av inn til «dei heilage romma», som Hillestad kalla dei. Blant dei som strøymde inn var elektroelevane, som kanskje kunne koma til å finna seg ein framtidig yrkesveg her, slik Kaldestad og Turner har gjort.

– Eg må jo sjå, men eg har tenkt meg ut i olja, var Odin Gjerde (16) sin kjappe kommentar på om Kvinnherad Breiband kunne vera ein potensiell arbeidsplass for han.

Lærlingen Oskar Kaldestad har allereie Kvinnherad Breiband som arbeidsplass. Han håper på å få halda fram der når læretida hans er over.

– Det er veldig kjekt her, og eg trivst godt her. Det er generelt mangel på fibermontørar, så eg trur det gode sjansar for å få jobb her vidare. Det vil i alle fall ikkje vera meg i mot, smiler ungdommen.

Meir utbygging

Kantineområdet var sett av til servering. Tidlegare breibandsjef Svein Nupen tok oppgåva med pølseserveringa, Arne Torget bytta ut servering av enderim med servering av saft og kaffi, og dagleg leiar Hillestad løyste ut det eine kakestykket etter det andre.

Når ein ikkje var i etinga, var det råd å kikka seg om i resten av lokala til breibandsleverandøren, og ein kunne bryna seg på quiz og praktiske oppgåver, som fiberspleising inne på lageret. Der inne møtte Grenda Stian Bøe og Christian Haugen, og begge veldig godt nøgde med å vera på plass ei dei nye lokala.

– I Dimmelsvik måtte me ha noko av dette ute. Her er alt på eitt plan, med varme og under tak, inkludert at alt står inne. Og det er enno ledig plass her, konkluderer dei to kollegaene.

Dei snakka begge varmt om både arbeidsplassen og arbeidet dei gjer, Bøe som IT-konsulent, Haugen som fibermontør.

– Kvinnherad Breiband har veldig god dekningsgrad i kommunen vår, men me er ikkje ferdig utbygde. Det merkar me kvar gong det kjem eit nytt byggjefelt, som til dømes Ospelunden. Ofte ser me at leidningsnettet ut til felta også må forsterkast ved slike utbyggingar. Så me skal ha til å gjera på i framtida også, sluttar Bøe og Haugen.