Kursar førstegongsfødande: – Ynskjer å styrka parforholdet

Det er helsesjukepleiarane Ingunn Sæverud Jensen og Solgunn Lyhammer Ask som skal arrangera kurset «Godt samliv». Dei ynskjer å nå ut til par som ventar sitt første barn saman.

Konfliktløysing

– Det er eit kurs for førstegongsfødande, og er å sjå på som ein fødselsførebuande pakke. Det blir fokus på parforholdet som dei vordande foreldra har. Me veit at det er ei stor endring å gå frå å vera ein familie på to til å bli tre, understrekar helsesjukepleiarane.

Før fødselen er utgangspunktet for kurset, men sidan det no er ein oppstart på kurset, har dei også opna for at foreldre som nyleg har fødd kan få delta.

Førebyggjande helsearbeid er ein stor del av tenestene til helsestasjonane.

– Det å styrka både kjærleiken mellom partane i eit parforhold, men også gi dei gode verktøy til å kommunisera og løysa konfliktar best mogleg, kan vera med og bidra til eit godt og varig samliv. Og det i seg sjølv har ein førebyggjande helseeffekt, for det kan styrka familien, seier Jensen og Ask.

Kurset skal gå over to kveldar, med to kursdelar på kvar av kveldane.

– Og med ein god matpause mellom øktene! påpeikar dei.

Betre helse

Korleis livet skal bli når ein får barn, handlar til dels om kva ein har med seg i bagasjen frå før, og kva ein har med seg av tradisjonar eller frå eigen oppvekst, som ein kanskje ikkje har snakka om med den andre parten.

– Når ein ventar eit barn, har ein kanskje ei forventning og ei tanke om korleis ein har lyst til å ha det, men det har kanskje ikkje blitt prata om. Så det å skapa dialog og rom for å snakka om dette, trur me er veldig førebyggjande. Og me i vår jobb tenkjer at dette definitivt er helseforhold, seier Ask og Jensen.

Litt forenkla er tanken at to foreldre som bur saman, gir betre økonomi, større stabilitet, og i sum betre føresetnader for å gi vidare god helse til dei andre i familien.

I 2020 kom det ei politisk målsetting om at alle førstegongsforeldre skal få tilbod om dette samtalekurset.

– Når det er politisk støtte og vilje til å få slike tilbod på plass, så ville me søkja om støtte til kurset. Det har me fått. På eit høgare nivå blir det meint at dette er eit viktig tilbod til førstegongsforeldre, og me tenkjer vi at det er eit viktig tilbod. Me i kommunen ynskjer det skal bli lettare tilgjengeleg for fleire. Jo fleire me når ut til, jo fleire kan gjerne klara seg over kneika, om ho kjem, oppsummerer dei.

– Me har tru på at det er førebyggjande. Dette er ikkje noko vi er pålagde å tilby, men me trur det kan ha god verdi, legg Ask og Jensen til.

Kurset blir skipa til i Kvinnherad Arena 28. oktober og 11. november.