Kursa dei folkevalde

Tidlegare ordførarar i Vaksdal kommune Eirik Haga var hyrt inn frå Kommunenes Sentralforbund (KS) til å losa både røynde og urøynde folkevalde gjennom utfordringar og formalitetar knytt til deira verv i politikken.

– Eg er ikkje her fordi eg har gjort alt rett i mine år som ordførar. Tvert i mot. Men eg har gjort ein del feil som eg har lært av, og kan læra vidare, sa han til dei kommunestyrerepresentantane og varamedlemmene han hadde kurs for under fredagsøkta.

Habilitet

Fungerande ordførar Thea Vaage (Ap) var også fungerande vertskap under samlinga torsdag og fredag, då ordførar Vegard Bjørnevik er nybakt pappa, og er løyvd velfortent permisjon i samband med si viktigaste oppgradering i livet.

– Det er kjekt at KS kjem og held desse møta for oss, slik at både nye og gamle representantar kan få lært og repetert korleis ein skal gjera når ein er folkevald. Torsdag hadde me ei god økt om mellom anna habilitet, noko som var eit stort tema i førre periode, og noko som er viktig for oss å ha kjennskap til, meinte Vaage (Ap) då fredagen var meir enn halvvegs unnagjort.

– Me har fått snakka om korleis me fremjar saker, tar ordet og andre enkle ting som ein skal gjennom som kommunestyremedlemmer, la Vaage til.

– Dette kurset er laga for dei som skal ha dette vervet, og det har vore veldig praktisk retta innhald. Mellom anna har ein hatt gruppeoppgåver der ein har sett på korleis ein som folkevalt ynskjer å ha saksframlegga. Det har vore eit spissa innhald, meinte kommunedirektør Leif Ove Mikkelsen om pensumet dei to dagane.

Blant temaa på kurset var samspelet mellom folkevalde, samspelet med lokalsamfunnet, samspelet med administrasjonen, rettar og plikter som folkevald og ikkje minst kva det inneber å vera folkevald.

Lærte av feil

I utgangspunktet stilte alle fast møtande medlemmer på kurset, medan talet på varamedlemmer som stilte på kurset varierte etter kor mange representantar dei ulike partia har i kommunestyret. Éin vara for partia med tre eller mindre representantar, to for dei opp til seks og tre frå Høgre, som har ni representantar i kommunestyret.

Kurshaldar Eirik Haga har for finpussa si framføring dei siste månadane.

– Dette er åttande kommunen eg har denne opplæringa i etter valet. Det er veldig kjekt å koma hit, for eg har ikkje vore her på Husnes før, smilte han då lunsjpausen gjekk mot slutten.

– Eg syns det at KS har hyrt inn meg… eg har ikkje vore nokon superordførar, men eg har lært av mine feil, og eg formidlar feila mine, slik at andre kan læra av dei, la han til.

– Eg syns det er stort engasjement og ein god tone mellom kommunestyrerepresentantane, og spørsmålsstillinga er ganske audmjuk, noko eg set pris på, sa Haga vidare.

– Det har vore trygge og gode rammer. Folk har fått læra med låge skuldrer, samtidig som dei har fått delta. Det har vore ganske godt arbeidsmiljø i kommunestyret frå før av, og det fundamentet ser ut til å vera her i dette kommunestyret også, vurderte ein nøgd kommunedirektør.