Kunstsamlinga er framleis unnateke offentlegheit - men berre fram til tysdag
Fordelinga av kunstsamlinga Kvinnherad kommune fekk i gåve frå banken har no vore klar ei stund, men kunsten står framleis nedpakka i rådhuskjellaren. Kvifor? – Det er per no ikkje ein prioritet.
Publisert
Komiteen som har hatt ansvar for å fordele kunsten i samlinga består av Lars Næs, einingsleiar for informasjon og innbyggjarservice, kulturrådgjevar Anita Lykkja, Knut Bjørgvik, einingsleiar for bygg og eigedom, samt Kent Are Kjørsvik Petterson, som er politisk vald frå Levekårsutvalet.
Gruppa har hatt fordelingslista klar ei stund. Dette kom fram då Grenda var i kontakt med Anita Lykkja i starten på april, der det også vart det sagt at fordelinga ville ta til etter påske.
Annonse
Fordeling av ansvar
Den praktiske jobben med å fordele kunsten er det ifølgje Lars Næs avdelinga for Bygg og eigedom som har fått ansvaret for, altså avdelinga som komité-medlem Bjørgvik er leiar for.
Det er han som medgir at fordelinga ikkje har vore ein prioritet.
Likevel meiner Bjørgvik at det ikkje er lenge til dei ulike kunstverka blir køyrt ut og montert eller hengt på plass i bygningane der dei er tiltenkt.
Annonse
– Sjølve utkøyringa har det vore snakk om vil skje no i månadsskiftet. Men det er eigentleg Geir Ove Fosse du må prata med, for det er hans folk som skal gjera dette arbeidet, forklarar han.
Set i gong førstkomande tysdag
Geir Ove Fosse er einingsleiar for Aktivitet, læring og meistring. Han kan stadfesta at kunsten er på trappene til å møta blikka frå offentlegheita igjen.
– Utkøyring startar tysdag neste veke. Håkon Hjelmeland som er tilsett hjå meg er ansvarleg for utkøyring, saman med Anita Lykkja som organiserer det heile med omsyn til fordeling av kunsten, skriv han i ein sms.
Vidare informerer Fosse om at dei større verka vil bli montert på kvar enkelt stad av driftsmontørar – tidlegare kjend som vaktmeistrar – samt at einingane sine tilsette vil kunne handtere mindre verk sjølve.
Tysdag 7. juni får Kvinnherad kommune forøvrig tilsyn frå Arkivverket, som skal vurdere korleis det kommunale arkivet blir handsama i forhold til Arkivlova.
Annonse
OBS: At kunstsamlinga er «unnateke offentlegheit» er eit ordspel frå journalisten, og ikkje ein faktisk offentleg beskriving av desse arkiv-plasserte objekta.
