Kunne ikkje prova alkoholpåverknad – gjekk fri frå promillekøyring

I rettssaka som fann stad midt i juli var det eit forhold frå sommaren 2023 som det skulle fellast dom i. Aktor ville døma den eine av mennene for å ha køyrt bil i alkoholpåverka tilstand og for å ha køyrt utan å ha førarkort, medan den andre mannen var tiltalt for å ha lånt ut bilen sin til ein som ikkje var skikka til å køyra han.

Nøkkelspørsmålet var om bilføraren hadde drukke før køyreturen, som mellom anna inneheldt nærkontakt med eit gjerde, eller promillen som bilføraren hadde då politiet kom til staden kom frå drikkinga etter køyreturen.

Tingretten hadde fleire vitneutsegn å vurdera, men ingen av dei var i stand til å fjerna all tvil kring hendinga, som fann stad i Kvinnherad. Ingen av dei to tiltalte er heimehøyrande i Kvinnherad.

– Retten kjem difor til at retten i fråvær av andre sikre prov og ut frå uskuldspresumpsjonen må leggja dei tiltalte sine forklaringar til grunn for vurderinga av kven som køyrde dei ulike køyreturane. (...) Retten kan såleis ikkje ut frå dei rettstoksikologiske resultata trekkja slutningar om kva tid dei drakk alkohol. Retten kjem etter dette at det ikkje er prova utover ein kvar rimeleg tvil at dei to tiltalte drakk før dei køyrde bil den aktuelle kvelden, skriv tingretten.

Dermed gjekk tiltalte fri frå tiltalen om køyring i ruspåverka tilstand. Dei to mennene blei likevel dømde på to andre tiltalepunkt. Den eine fekk 9000 kroner i bot for å ha køyrt bil utan førarrett, og den andre fekk lik bot for å lånt vekk bilen til ein person som ikkje hadde førarkort.