Kulturskuledagane: Inviterer til opne timar og framsyningar
4. - 8. april arrangerer Kvinnherad kulturskule Kulturskuledagane, der nyfikne born og vaksne kan forvita seg på dei ulike tilboda.
Publisert
Sist oppdatert
Kulturskulen nyttar høvet til å skapa litt blest rundt tilbodet dei har.
«Etter ei tid med få konsertar grunnar corona, og fordi vi ynskjer å rekruttere nye og enda fleire elevar til neste skuleår. Me opnar for nye søknadar 1. april så det er perfekt timing for oss å vise oss fram og for at dei som er nysgjerrige på kva me driv med skal kunne besøkja oss.» skriv elevinspektør Silje Eide i ei pressemelding.
Annonse
Under kulturskuledagane blir det fleire «opne timar» i fleire fag, men dei vil bli gjennomført på ulike måtar. I enkelte timar vil dørene til undervisningsromma vera fysisk opne, eller det kan gå føre seg som «kompistimar» der eleven kan invitera med seg ein ven.
Sjå og høyr!
«Me vil òg ha to planlagte framsyningar i Konsertsalen på Kulturskulen, og om mogleg fleire pop up performances rundt omkring gjennom veka. Biletkunst vil ha ei utstilling som blir ståande heile veka, samt at dei og inviterer til å vera med å lage påskepynt måndag og tysdag.» informerer ho vidare.
Forutan dei opne timane kan ein også få med seg ulike framsyningar desse dagane.
Annonse
Måndag kveld blir det konsert i black boxen. Dagen etter er det song og teaterframsyning på Husnes, medan det er open time i biletkunst i Rosendal. På torsdag 7. april skal medelevar og føresette på Hatlestrand få ein forfriskande oppleving, då blåseensemblet der skal framføra sine kunster.
Oppmodinga frå kulturskulen er klar:
«Kom innom og snakk med oss, sjå og høyr!»
