Kulturminnedag med folkedrakt og tradisjonsmat

Laurdag vart kulturminnedagen markert i Rosendal Samfunnshus.

Markeringa var eit samarbeid mellom Kvinnherad kommune og Omvikdalen Bygdekvinnelag. Tema for dagen var folkedrakter og tradisjonsmat, noko ein i foajeen fekk demonstrert av fleire. Der sat Elisabeth Arnevik Bakke, Kjersti Bondhus, Inger Berge Eik, Marit Langballe og Atle Støve på utstilling og putla med ulike bunadsrelaterte arbeid, samt at Birgit Hjelmeland steikte mjelkekaker.

Folkedrakter

– Kulturminnedagen er Norges største kulturfestival, med over 300 arrangement denne veka, kunne kulturkonsulent i Kvinnherad kommune Anita Lykkja fortelja.

Esther Falk frå bygdekvinnelaget uttrykte glede over å bli spurd om å vera medarrangørar.

– Temaa er viktige for laget vårt. Me har alltid vore positive til at kulturen er i endring, samt vore ivrige på å ta vare på den delen av kulturen der spesielt kvinnene har vore berarar av kulturhistoria, som klede- og mattradisjonen, sa Falk.

Grethe Brundtland hadde nett bak seg eit besøk til Guatemala, og heldt eit interessant føredrag om folkedrakter under samlinga i samfunnshuset. Ho trekte linjer mellom dei guatemalanske folkedraktene – som er i dagleg bruk blant kvinnene i landet – og til samiske kufter og norske bunader, og då fortrinnsvis Hardanger- og Kvinnheradbunad.

– I Guatemala signaliserer drakta både kor du kjem frå, kva språk du snakkar og kva sivil status du har, sa Brundtland då ho fortalte frå sitt besøk i det mellomamerikanske landet.

Ho meinte også å sjå at det var ei aukande interesse for bunader i Norge.

– Er det eit uttrykk for ein lengsel etter identitet og at me høyrer til ein plass? spurde Brundtland.

Tradisjonsmat

Ingrid Landmark frå Norges Bygdekvinnelag hadde tatt turen til Rosendal for å snakka om tradisjonsmat. Tidleg i føredraget slo ho fast at det einaste som var sikkert er at tradisjonsmat ikkje kjem til å stå i ro.

Landmark fortalte om dei lokale skilnadene ulik mat hadde, og ho hadde blant anna registrert at det er skilnad på kva side ein smørjer på mjelkekakene frå ein stad til ein annan.

– Slikt kan det fort bli sjau om, sa ho, og med det antyda at ho visste kva kvasse frontar det er i mjelkekakemiljøa i Sunnhordland.

Føredraga til Brundtland og Landmark gav dei kring 50 frammøtte fin innsikt i interessante tema. Etterpå var det høve til å smaka på tradisjonsmat i form av nemnde mjelkekaker og rjomegraut.