Kulturell visningstur i Rosendal

Sist laurdag fekk seks turoperatørar frå fire land ei rask innføring i kva Kvinnherad har å by på. Gjestene som kom frå Spania, Tyskland, Frankrike og Belgia, vart tatt i mot av reiselivsleiar Margit Lund-Mikkelson.

Visningsturen vart organisert av Fjord Norge, og gruppa bestod av seks turoperatørar frå Spania, Tyskland, Frankrike og Belgia. Desse vart teken i mot av reiselivsleiar Margit Lund-Mikkelson, som viste fram nokre av kulturperlene i Kvinnherad. Temaet for turen var nemleg kultur og attraksjonar, og Rosendal var difor ein sikker vinnar å besøkje.

– Turoperatørane er ein snartur innom Rosendal for å sjå litt av det me har å tilby av kultur og attraksjonar. Me skal mellom anna på synfaring i Baroniet, Steinparken, Dinosaurhuset, Folgefonnsenteret og på lunsj hos Elins matgleder. I tillegg skal eg halde ein presentasjon av heile kommunen for å vise kva me elles har av ulike attraksjonar, fortalte Lund-Mikkelson.

Flott oppleving

Kvinnherad har tidlegare hatt fleire visningsturar, men som følgje av koronapandemien har slike turar vore fråverande dei siste to åra.

– Etter ein lang pause er det kjekt å endeleg få til slike visningsturar. Dette er svært positivt for reiselivsnæringa, og det viser jo at det internasjonale markedet er klare for å reise igjen. I dag får me vist fram noko av det beste me har å tilby, og kultur-attraksjonar er absolutt eit området me vil satse meir på. Og til stor gleda for mange av dei besøkjande kom det jo litt snø også, smilte reiselivsleiaren.

Turoperatør Agathe Deymard frå Frankrike jobbar for «Amplitudes», og har ansvar for turar i Skandinavia. Dette var hennes første møte med Norge, og det å besøkje Rosendal syns ho var ei særskild flott oppleving.

– Det er fantastisk her i Rosendal. Trea, med all snøen, det er magisk. Eg elskar spesielt å snakke om fjordane til kundane mine, og eg har sett nokre av dei på denne turen. Lufta og lyset her er også noko heilt for seg sjølv. I løpet av dagen ser ein fleire lys i landskapa, og jo lenger du kjem nord jo meir lys er det. Det er nydeleg, meinte franskdama som gledde seg stort til å bli kjent med Rosendal og resten av Kvinnherad sine attraksjonar.

Julestemning

Gjestene hadde tidlegare vore i Ryfylke, Hardanger og Odda. Salsdirektør Marianne Johnsen i Fjord Norge var særs nøgd med turen så langt.

– I eit nært samarbeid med destinasjonsverksemda og Innovasjon Norge arrangerer me denne visningsturen for å gjere turoperatørarane kjent med Norge, og noko av det beste me har å tilby. Me har lagt opp eit svært spennande program, der dei har fått opplevd kulturattraksjonar som mellom anna konsertar, besøk på Agatunet og cidersmaking både i Ryfylke og i Hardanger. Dessutan har ingen av gjestene vore i Rosendal før, og ettersom dei fekk moglegheit til å velja visingsstader sjølve, verkar det som denne staden var høgt oppe på prioriteringslista, fortalte Johnsen, før ho la til:

– Eg arbeidar mellom anna med å spreia trafikken. Ved å leggje opp turane no, viser det at det er fullt mogleg å vera turist også på denne årstida. Det var difor svært kjekt at det kom litt snø. Julestemninga har vore på topp. Me har fått servert riskrem med mandel i, sunge julesongar og hatt snøballkrig, lo ho.

Etter programmet i Rosendal gjekk ferda vidare til Bergen, som var deira siste destinasjon i Norge, for denne gang.