Kryssa ekvator for å stupa på Årsnes

Denne veka har ti angolanske oljearbeidarar lært seg fritt fall-stuping hos Norsafe.

Gjengen frå Angola er automatikarar, elektrikarar og mekanikarar, og alle jobbar med vedlikehald på ein stor produksjonsrigg. Riggen ligg vest for hovudstaden Luanda, men for å få rette kurset, reiste dei til Norge og Årsnes.

– Det er det beste treningssenteret i verda. Dei er best sertifisert av alle, og dei lagar sjølve dei livbåtane dei brukar her. Difor har me reist frå Angola for å koma hit og trena, seier Americo Sone og Mamadeu Canjungo.

 

Stup

– Kjekt å høyra, smiler leiar ved testsenteret Michael Røssland i retur, og legg til:

– Dei har jo flydd over ein del testsenter for å koma hit, så me tar det som eit heidersteikn at dei sender riggarbeidarane til oss.

«Dei» i denne samanheng er Exxon/Mobil. Røssland trur hovudgrunnen til at dei valde senteret på Årsnes er at Norsafe har levert livbåtar til riggen.

– Om ikkje båtane er heilt like, så liknar dei i alle fall veldig. Me har vore gjennom mange fritt fall-stup, og no er det jubel og leven kvar gong dei stuper, fortel leiaren med eit glis.

Då Grenda snakka med dei ved lunsjtider onsdag, var angolanarane litt mindre tydelege enn Røssland på at stuping var stas.

– Nja, eg var ikkje like begeistra i starten, vedgår Sone.

Kurset deira er over på torsdag ettermiddag, før dei set nasa heim att mot Angola. Alle ti er frå hovudstaden Luanda.

– Det er den beste byen i verda. Og den dyraste byen i Afrika. Me likar å vera på toppen av listene, gliser karane.

Når angolanarane returnerer til den andre sida av ekvator, er det framleis travle dagar på Årsnes.

– Me har køyrt kurs kvar veke dei siste to månadane, og er fullbooka til sommaren, sluttar ein nøgd Michael Røssland.