Kritiserer budsjettprosessen: – Skuffande

– Det har ikkje vore samtalar mellom partia for å gjera vurderingar i fellesskap, kommenterer leiar i Kvinnherad SV, Silje Nordtveit Olsen.

Ho understrekar at partiet har vore i kontakt med alle dei andre gruppeleiarane for å be om samtalar om budsjettrevisjonen, utan å ha fått respons.

– Det har ikkje vore dialog, noko vi synest er veldig synd og skuffande. Etter at vi i haust gjekk saman om å laga eit felles budsjett for 2024, hadde vi forventa at vi skulle gjera det same no med revidert budsjett, seier Silje Nordtveit Olsen.

26 grader i klasserom

Ho fortel at SV ynskjer å setja av meir pengar til drifta av Kvinnherad kommune, og trekkjer fram fleire saker som partiet hadde sett fram til å drøfta med dei andre. Mellom anna gjeld det ventilasjonsanlegget på Malmanger skule.

– Vi har fått melding frå FAU på Malmanger om at anlegget dei har no ikkje fungerer. Ein dag i mai skal det ha vore 26 grader i klasserommet, og elevane måtte dermed sendast ut. Men skulen har eit anna ventilasjonsanlegg som kan monterast, det har berre ikkje blitt sett av pengar til å gjera det. Dette er eit strakstiltak som det burde vore rom for å drøfta i revidert budsjett, vurderer Olsen.

Eit anna punkt er leikeapparata ved skular og barnehagar rundt om i kommunen.

– Mange stader rotnar apparata på rot. Vi blir kontakta av styrarar som ber om at noko blir gjort, seier lokallagsleiaren i SV.

Ser ikkje bra ut

Det siste punktet Silje Nordtveit Olsen trekkjer fram, gjeld stoda innan eininga for Bu og habilitering. Eininga skal ifølgje Olsen no mangla heile 19 årsverk. Dessutan er det stort behov for å rusta opp mange av dei kommunale bustadane.

– Det ser slett ikkje bra ut i nokre av desse bustadane. Her er det naudsynt med strakstiltak, slår ho fast.

– Vi stiller spørsmålet; kvifor er ikkje koalisjonen interessert i å gå inn i drøftingar med oss?, avsluttar ho.

Sjå svaret frå Per Harald Havnen Löfgren Johansen (Ap) i eiga sak.

– Ligg allereie an til tidenes dyraste kommunestyremøte