Kristian (9) sel juletre til inntekt for ei god sak med storebrørne sine : – Kjekt å bli kjent med nye folk

Det er for lengst blitt ein juletradisjon for Tvedt-brørne å selja juletre utanfor Spar-butikken på Valen. Dei fortel at også i år har det vore bra med kundar, og at dei ser at det er mange av dei same som kjem igjen år etter år. Det må jo tyda på at kundane er nøgde med juletrea sine, som forøvrig er hogde i Ryfylke.

Tvedt-brørne sel juletre til inntekt for ei god sak

Går til ei god sak

Det var storebror Mathias Tvedt (19) som starta juletresalet til inntekt for ei god sak tilbake i 2018. Men no er det dei tre yngre brørne som har overtatt stafettpinnen etter han, som for tida er på «havet» i samband med jobb.

20 prosent av salet går til hjelpeprosjektet MaMa’s children’s center of Norway på Filippinane.

– Det er foreldra mine som engasjerte oss i denne saka, som med åra har blitt eit lite familieprosjekt, fortel pappa Njål Tvedt.

I 2018 var han og Mathias på besøk til organisasjonen på Filippinane, og i 2022 var det Ole sin tur til å besøka mellom anna barneheimane der nede. Det var ein tur som gjorde inntrykk, ifølgje Ole. I februar går turen ned igjen. Då skal Njål, saman med ein gjeng, ned for å jobba.

Stig i gradene

Denne dagen er det yngstemann Kristian (9) og storebror Ole (17) som står for salet, men også Lars (12) har vore mykje med denne desemberen.

– Dei har stått her i helger og etter skuletid, fortel pappa.

Etterkvart som gutane blir eldre, rykker nestemann i rekka stadig opp i gradene. I år er det altså Ole som er «sjefsseljar», men om nokre år er det Lars, og seinare blir det Kristian som skal ta over.

– Så de har ikkje planar om å avvikla det årlege juletresalet med det første?

– Nei, det har vi ikkje, smiler dei to brørne.

Trassar vêr og vind

– Korleis har det vore å selja juletre i dette ruskete vêret?

– Det er litt kaldt, men det går greitt, smiler storebror Ole, og lillebror Kristian er heilt einig.

– Det kjekkaste er å bli kjent med nye folk, legg 9-åringen smilande til.

Minstemann har nokre turar innom butikken for å varma seg litt innimellom.

Travelt

– No har vi berre åtte tre igjen. Dei andre åra har vi selt ut alle, med unnatak av fjoråret - då hadde vi nokre få igjen, informerer Ole.

Han har alt nokre år på baken som juletreseljar, og kan derfor fortelja av erfaring at det er den siste helga før jul som plar vera den travlaste for dei i bransjen.

– Men i dag har det vore ganske roleg. Det trur eg kjem av det dårlege vêret. Folk ventar kanskje til det er litt betre før dei tar turen, legg han til.

Men det meiner pappa Njål er risikosport.

– Skal ein ha dei finaste trea, så må ein vera litt tidleg ute. Med det sagt så er dei fine dei trea som står igjen her også, smiler han.

«Skomakerens barn ... »

Lillebror er trygg på at dei skal få selt ut alle trea i år.

– Vi har framleis tre dagar på oss. Dessutan plar vi ta det siste treet sjølv, smiler Kristian, som med den kommentaren får pappa til å mimra.

– For to år sidan skulle vi også ha det siste treet, men så viste det seg at vi hadde kalkulerte litt feil. Eg hadde fått treet på fot, og så banka det på døra. Der stod det nokre kundar som skulle henta treet sitt, og vi blei beint nødt til å røska det opp frå foten igjen. Då måtte vi faktisk ut i skogen for å hogga oss eit nytt, ler pappa Njål, som i år, klok av skade, allereie har fått treet på plass.