Kristian (14) gjekk frå speedbåt til ei 40 år gamal snekke

Grenda møter snekke-eigaren og kompisen Lars Gaastal i båthamna på Sunde. Det er søndag, sola skin og gutane ladar opp til ein flott dag på sjøen.

– Velkomen ombord, seier skipperen til bladfyken.

Om bord i snekka har den nevenyttige ungdomen, ved god hjelp av far sin, byta anlegg, propellar og motor. I tillegg har han skrubba, vaska, botnsmurd og polert saman med kompisen Lars. Snekka ser ut som eit glansbilete, og kapteinen er nøgd med arbeidet så langt.

– På nyåret byta eg speedbåten min i denne snekka, og har sidan då arbeidd med å få ho klar til 17. mai. Det var ein skikkelig god handel, sjølv om eg har hatt ein del arbeid og utgifter med den. Eg trudde mellom anna ikkje at motoren var så galen så den var. Det var ikkje før eg røyklagte heile Sunde at eg fann ut at den måtte skiftast, ler ungguten frå Husnes.

– Når det gjeld utgifter,betalar du sjølv?

– Eg betalar sjølv ja, og pengane tenar eg på ulike vis. Til dømes kløppar eg litt plenar rundt om, svara han.

Døypt til «MS Berit»

Den 25 fot lange plastsnekka vart henta på Halsnøy. Det er ein 1984-modell Skilsø 23, og den nye Bukh-motoren byr på 20 hk. Snekka har fått namnet Berit.

– Både kjærasten til bestefar og læraren min heiter Berit, så då måtte eg sjølvsagt døypa snekka til MS Berit. Det er eit kult og originalt namn, forklarar han.

14-åringen har alltid vore interessert i båtlivet, og når det gjeld båtar likar han når det gir litt lyd i frå seg. Når Grenda spør kvifor han valte å byta speedbåten i ei gamal snekke har han eit fornuftig svar.

– Speedbåten var alt for dyr i drift, så dyr at eingong ikkje grasklippe-pengane klarte å dekkja det. I tillegg sokk den førre året, seier han og held fram:

– Snekka derimot, den er både romslegare og billegare. Det er nesten så det aukar på tanken når eg køyrer, så no kan eg samla heile kompis-gjengen og køyra så mykje eg berre orkar. Og god plass til jenter er det også, smiler Kristian.

Etter mykje arbeid vart snekka klar førre veke, og sidan den gong har Berit fått lufta seg omtrent kvar einaste dag.

– Sjølv om eg saknar litt fart, er det fleire fordelar med snekka. Til dømes skal eg montera varme i den etter sommaren, slik at den også kan nyttast på vinterstid. I tillegg er det fullt mogleg å overnatte.

Bjørk og flagg

Og snekka skal sjølvsagt få lufta seg på den store nasjonaldagen. Allereie på søndag stod MS Berit flott pynta med både bjørk og flagg, og gutane har store planar for dagen.

– Me er ein kompis-gjeng på ti som skal følgja 17. mai toget langs sjøvegen. Både fløyter og potetkanon ligg klar, så det blir ein skikkelig fest på sjøen i år. Og heldigvis rakk eg å montera det nye anlegget også.

Eit anlegg som kosta meir enn sjølve båten.

– Det er skikkeleg futt i det. 10.000 kroner kosta det, men såpass må det vera, fastslår han.