Kriminalteknikarar er i gang på Varaldsøy

Kriminalteknikarar frå Vest politidistrikt er no i gang med åstadundersøkingar på Varaldsøy.

Like etter klokka 12 var dei kvitkledde kriminalteknikarane på plass på Varaldsøy. Dei sikrar no området for det dei kan finna av spor.

– Her vil dei halda på utover dagen, så lenge som det er behov. Dei er no i gang med åstadundersøkingar rundt avdøde, og vil sikra dei spora dei treng frå åstaden. Vi har også ein kriminalsøkingshund som sonderer rundt åstaden, seier lensmann Sigurd Børve til Grenda.

Lensmannen kom til Varaldsøy like før klokka 13 fredag. Han starta med å orientera det store pressekorpset som hadde teke turen til Varaldsøy.

– Vi har eigentleg ikkje så mykje utfyllande informasjon på nokon av partane. Krimteknisk er i gang med sitt arbeid. Når det kjem til den sikta mannen, så vert han avhøyrt no og vil bli framstilt for varetektsfengsling i Bergen tingrett klokka 10 i morgon, seier Børve.

Lite informasjon

Av omsyn til å få ei så god etterforsking som mogleg, ynskjer ikkje politiet å gå ut med informasjon frå sine vitneavhøyr på noverande tidspunkt. Børve fortel også at dei ikkje vil seia noko om dødsårsak eller korleis den drapssikta mannen i 40-åra held seg til siktinga.

– Det eg kan seia er at vi veit at den sikta mannen og avdøde hadde relasjon i form av at dei kjente kvarandre, men dei var ikkje i slektskap eller noko anna nær relasjon, seier Børve til Grenda.