Krev låge lakselusnivå og nullvisjon mot rømming

Fylkesutvalet i Vestland ynskjer høg produksjon på oppdrettsanlegga, men også at bransjen skal påverka miljøet minst mogleg.

Fylkesutvalet vedtok i slutten av november å senda innspel til utgreiinga «Heilskapleg forvaltning av akvakultur for berekraftig verdiskaping», som no er ute på høyring. Mandatet til utvalet som har laga rapporten, var å sjå på korleis løyvesystemet for akvakultur bør innrettast for framtida. Dette sett opp mot målsetjinga om å oppnå størst mogleg verdiskaping innanfor berekraftige rammer.

– Vi meiner at vedvarande låge nivå av lakselus og ein nullvisjon mot rømming av oppdrettslaks skal vera eit overordna mål. Rapporten er ikkje tydeleg nok på dette, og det er ei svakheit med utgreiinga, seier fylkesordførar Jon Askeland til fylket si heimeside.

Visningsløyve

Fylkesutvalet meiner at det må vere eit mål at havbruket påverkar miljøet minst mogleg, samstundes som eit havbruk med høg produksjon, verdiskaping og sysselsetting blir sikra.

– Dette inneber at næringa, det offentlege og forskingssektoren tar eit krafttak for å sikra eit berekraftig havbruk i framtida. Teknologien er komen langt. Med endå tydelegare krav og insentiv for å redusere negativ miljøpåverknad, er ein nullvisjon mot rømming og vedvarande låge nivå av lakselus i nær framtid ikkje urealistisk, analyserer Askeland.

I alt har fylket skrive opp 11 punkt i uttalen sin. Eitt av dei handlar om at det snarast må gjerast endringar i regelverket som gjev fortrinn til miljøteknologi, grunna berekraftsutfordringane i oppdrettsnæringa. Dei ber også om at mangfaldet i næringa blir sikra gjennom likebehandling av store og små oppdrettsselskap. Det er elles verdt å merka seg punktet der fylket skriv at ein bør vidareføra ordninga med visningsløyve.