Krev handling

– Den norske stat sin straum er bygt på dugnad og slit av folket, og krafta er vår felleseige. No har stortingspolitikarane over fleire år forhandla vekk det som er grunnfjellet og lokomotivet for den norske befolkninga og for det grøne skiftet. Eg føler det på kroppen at mange slit. Slik skal det ikkje vera, tordnar Hardeland.

Og midt i utfordringane meiner han at politikarane pratar det heile vekk.

– «Me skal sjå på det», seier dei. Kva hjelper det folk at myndigheitene skal sjå på det? Eg er mildt sagt irritert på dei som sit stille i båten no. Alle partia som har hatt ministrar dei siste åra, Ap, Høgre, Frp og Sp, har ansvar i dette, og no må dei rydda opp! Dette er ein ny skatt som folket må betala.

Aktiv i kulissane

Før jul byrja Hardeland å legga press på stortingsbenken til Ap i samband med utfordringane i kraftmarknaden, mellom anna gjennom brev og telefonsamtalar, der han mellom anna har peika på at det er marknadskreftene som styrer forvaltninga av den norske krafta.

Hardeland tykkjer dessutan det er heilt på tvers av Arbeidarpartiet sin politikk å gje straumstøtte, og meiner dette kun bør vera eit tiltak ein tyr til i korte periodar, til ein har styring att.

– Å gje straumstøtte over tid er ikkje politisk korrekt for Arbeidarpartiet. Då bør nokon i Ap lesa høgt frå Einar Gerhardsen si bok «Tillitsmannen».

Boka han siktar til vart utgitt for første gong i 1931, og har undertittelen «en håndbok for tillitsvalte».

– Kor er statsministeren?

I omgrepet tillitsvalte ligg litt av kjerna i det som gjer Hardeland forbanna.

Dei som sit i regjeringa er valt inn i sine posisjonar, men den lokale Ap-politikaren meiner leiinga i partiet utviser ein arroganse mot medlemmene sine.

– Når ein står oppe i slike utfordringar som me gjer med straumen i dag, så skal statsministeren ivareta landet. No ser eg han ikkje! Slik eg ser det lyttar ikkje regjeringa til folket. Og distrikta – der verdiskapinga skjer – blir ikkje sett, seier Hardeland, før han kjem med eit konkret døme på dette.

Då olje- og energiminister Terje Aasland (Ap) vitja Mauranger for å høyra om Statkraft sine planar om å utvide produksjonen ved anlegget der frå 250 til 880 MW 7. juni, fekk ikkje Kvinnherad Arbeidarparti vita noko om besøket, før dei las om det i avisa.

– Hadde me visst at han skulle koma, ville me sjølvsagt snakka med han om situasjonen vår. Når dei som styrer viser ein slik arroganse mot medlemmene sine, korleis skal dei då vita kva som er utfordringane i Kvinnherad? Eg er forferdeleg skuffa over energiministeren, slår Hardeland fast.

Kritisert for arroganse og hemmeleghald

Tynnsliten tillit

Han understrekar vidare at det ikkje er mogleg å gjera om på situasjonen dersom lokale bedrifter går konkurs og folk mister arbeidsstadane sine.

– Dersom det ikkje kjem gode støtteordningar til bedriftene lyt me ta debatten i kommunestyret om støtte, slik Erna ynskjer. Tuben skal pressast tom, seier han, og held fram å proklamera:

– Støre og regjeringa skal visa handling og gje befolkninga tryggleik! Det gjer dei ikkje no, noko som gjer meg veldig skuffa. Arbeidarpartiet skal ikkje vera der! Dei er valt inn for å tena folket, men det ser det ut til at partileiinga har gløymt. Tilliten til regjeringa er no på eit minimum.

Avlat

– Kva handlingar saknar du?

– Til dømes når det gjeld magasinfylling, så skal regjeringa instruera kraftselskapa om fyllingsgrad. Det må bli slutt på at Statkraft, direktørar, økonomar og embetsverk skal styra. Då treng me ikkje politikarar, kommenterer han kvasst.

Hardeland meiner elles ein må yta for å nyta. Utbygging og modernisering av vasskrafta vil sikra norske bedrifter og heimar med straum i fleire år framover, og dette er vegen å gå, heller enn å satse på vindkraft, tykkjer han.

I tillegg meiner han at ein må kutta ut elektrifiseringa av sokkelen.

– Det prosjektet blir subsidiert med store pengesummar av folket. Dette kallar eg å kjøpe seg avlat, meiner Hardeland.

Ny prisrekord igjen

Straumen er vår felleseiga

Hardeland meiner at utanlandskablane er eit sugerør inn til Norge, og tykkjer det er på tide å innrømma at det er kablane som importerer straumprisen inn på det norske nettet.

Han ser på straumen som folket si felleseiga, og prioriteringa burde difor vera å syta for sine eigne først, og dernest selja overskotet.

– Norge produserer ein promille av straumen EU treng, så dei må ikkje koma her og sei at me skal ofra hovudmotoren, som har vore drivkraft i over hundre år. Politikarane prøver å pynta på dette, men me er jo ikkje naive. Skrønene og bortforklaringane gjer folk forbanna, seier Hardeland, og kjem med eit biletleg døme:

– Har du ein gard, haustar du fôr til dyra dine. Du sel ikkje fôret til naboen om hausten, for å kjøpa det dyrare tilbake seinare. Men du kan selja det du har til overs.

Kan knusa partiet

Hardelad er for det grøne skiftet, og meiner Norge skal klare dette godt, nettopp på grunn av straumen. Men no meiner han me gir vekk det beste kortet på handa.

– Gjennom heile mitt liv i politikken har eg aldri følt ein sak plaga meg slik, medgir han.

– Er det noko parti som fører ein straum-politikk du kan stilla deg bak?

– Rødt er eit parti som gjer noko rett – ikkje i andre saker, men når det gjeld straum. Men hadde Ap vore dyktige, ville partiet truleg lege på 30 % oppslutnad no. Slik er det ikkje. Eg trur dette vil knusa partiet, sluttar han.

Normal fyllingsgrad i Blådalsvatnet og Fjellhaugvatn