Krev at studielinjer i Fusa og Stord vert oppretthaldne: – Utruleg viktig

Det ligg føre forslag om å leggja ned mange linjer på Fusa vidaregåande skule og to på Stord vidaregåande. Eit samrøystes kommunestyre i Kvinnherad krev i staden at linjene vert oppretthaldne.

For tida er eit forslag om ny tilbodsstruktur hjå dei vidaregåande skulane i Vestland ute på høyring. Forslaget inneber ingen endringar for Kvinnherad vidaregåande skule i denne omgang, men for Fusa vidaregåande i Eikelandsosen ser det dramatisk ut. Der kan alle linjer med yrkes- og studiekompetanse forsvinna, i tillegg til «Kunst, design og arkitektur». Også Stord vidaregåande vert råka; der går forslaget ut på å leggja ned «Musikk, dans og drama» og «Media og kommunikasjon».

Bakgrunnen for høyringa er at det i dei siste åra har vore svært mange ledige plassar i skulane. Talet i år er 2.500 ledige plassar, og dei neste ti åra vil dette dobla seg til 5.000.

Saka vart teke opp i kommunestyret på torsdag.

«Dersom skuletilbodet blir så smalt som høyringa legg opp til, må ungdomane våre kanskje reisa langt. Dersom Fusa vidaregåande blir lagt ned, vil dette få konsekvensar for elevar nord i kommunane, som i stor grad har skuleplass der», skreiv kommunedirektøren i saksutgreiinga.

Utan eit tilbod i Fusa, må desse elevane flytta heimanfrå og bu på hybel. Fusa vidaregåande har mellom anna eit samarbeid med Ølve industrier.

Utruleg viktig

I ein uttale frå Sunnhordlandsrådet vert det teke til orde for å at ein må oppretthalda dei kreative faga på Stord, slik at utvalet linjer ikkje vert for smalt. Om naudsynt bør ein fortsetja med halve klassar, meiner rådet. Kommunedirektøren i Kvinnherad innstilte på å støtta Sunnhordlandsrådet, i tillegg til å laga ein eigen uttale om støtte til Fusa vidaregåande.

– I denne saka vil eg påstå at for Kvinnherad sin del, så er Fusa vidaregåande skule ein nærskule for bygdene Hatlestrand og Ølve, og det er utruleg viktig at vi har ei meining om skulen der, sa ordførar Vegard Bjørnevik (H), som også karakteriserte linjene på Stord som utruleg viktige.

Innstillinga vart samrøystes vedteke.