Kravd at kommunen må drifta eventuell vidare satsing
Det vart løyvd 950.000 kroner til Modige Talent, og prosjektet vart fullfinansiert av midlar frå barnefattigdomsprosjektet i Kvinnherad kommune.
Publisert
Kvinnherad var ein av fem kommunar i Hordaland som vart tildelt skjønsmidlar frå Hordaland Fylkeskommune (no Statsforvaltaren i Vestland) i perioden 2015-2019. Midlane skulle, i følgje utlysingsteksten, gå til å utvikle strategiar mot fattigdom i barnefamiliar og redusere skadeverknader av fattigdom på barn.
I budsjettet til Modige talent var den totale kostnaden rekna til 1.096.000 kroner, medan dei faktiske utgiftene til prosjektet til sist landa på 479.662 kroner. Dette kjem fram av sluttrapporten til Modige talent. Kvinnherad kommune har difor fått spørsmål om kva dei resterande midlane frå barnefattigdomsprosjektet har gått til.
Annonse
Har fordelt midlane
Lene Gjuvsland Skjelnes, som leia barnefattigdomsprosjektet, stadfestar at midlane har gått til andre tiltak innanfor same felt her i kommunen.
– Dette var i hovudsak eit femårig haldningsprosjekt. Og i løpet av dei åra fekk me eit overblikk i kva det skorta på her hos oss. Gratisprinsippet i skulen fekk mellom anna stort fokus. Me såg at dette prinsippet vart teke omsyn til i vekslande grad rundt om på skulane, fortel Gjuvsland Skjelnes.
Ein del av midlane gjekk difor til innkjøp av utstyr til BUA. Vidare har pengane gått til aktivitetsdagar i Fjellhaugen og andre konkrete tiltak som har bidrege til å gi eit likt tilbod til alle born i Kvinnherad.
Annonse
Eit anna tiltak som såg dagens lys gjennom denne satsinga var satsinga på Ungdomslos, som starta opp som eit prosjekt, men som i dag er drifta av kommunen.
– Då vi fekk desse midlane vart det stilt tydelege krav frå Statsforvaltaren. Er dette noko ein vil driva vidare? Dersom svaret var ja, var det eit krav at tiltaket skulle drivast vidare av kommunen, informerer Gjuvsland Skjelnes, og understrekar at tiltaka kommunen ønskte å gå vidare med dermed ikkje kunne bli finansiert av prosjektmidlar.
Sjølv om det er nokre år sidan barnefattigdomsprosjektet vart avslutta, peikar ho på at Modige talent vart vurdert som eit godt initiativ og prosjekt, og understrekar at det også var grunnen til at prosjektet vart løyvd midlar frå denne potten. Ho slår fast at Modige talent var eit tilbod som bidrog til å auke mangfaldet av aktivitetar i kommunen, samstundes som det gav born og unge ein ny arena å treffast på.
Barnefattigdomsprosjektet
Barnefattigdomsprosjektet i Kvinnherad hadde som målsetjing å «avdekke og redusere barnefattigdom. Betre tverrfagleg samarbeid, og samordning av tiltak mellom kommunale instansar, og også med eksterne samarbeidspartar.»
Bakgrunnen for satsinga var at Stortinget gjentatte gonger sidan slutten av 1990-talet hadde gitt uttrykk for at det var behov for å styrke innsatsen mot barnefattigdom. I prosjektbeskrivinga frå 2015 vart følgjande nemnd:
Annonse
«I treårsperioden 2009-2011, som er den siste perioden Fafo har tal for, levde i underkant av 8 prosent (82.000 barn) av alle barn i familiar som hadde hatt inntekt under EU’s lavinntektsgrense i minst to av tre år. (…) Tal for Kvinnherad i same periode er 9,7% (300 barn).»
Dei siste tala som er offentleggjort for barnefattigdom i Norge gjeld for 2019. Desse viser at 11,7 % av alle born i Norge vaks opp i ein familie med vedvarande lavinntekt i 2019. Auken frå året før var på meir enn 4000 born. I Kvinnherad var det i 2019 registrert at 9,9 % av borna vaks opp i ein familie med vedvarande lavinntekt, noko som viser at ein svak auke her i kommunen dei ti siste åra.
Bufdir viser til rapportar som indikerer at dei som frå før hadde låg inntekt, samt barnefamiliar, har blitt ekstra hardt råka av permitteringar og oppseiingar som følgje av tiltaka mot koronapandemien på vårparten 2020. Tala for 2020 vil bli offentleggjort i 2022.
