Krast brev til fylket: – Forventar at framlegget blir lagt bort utan opphald

Onsdag sendte Vegard Bjørnevik brev til Fylkesutvalet, som er fylket sitt svar på formannskapet. Han sendte det også til gruppeleiarane i Kvinnherad. Til sistnemnde legg han til:

«Eg har sendt følgjande brev til medlemmene i Fylkesutvalet i Vestland fylke. Eg håpar at de alle vil ta ein prat med partikollegaene dykkar i fylket om denne saka. Det ligg eit tungt alvor bak forslaget frå Fylkesrådmannen, og me må stå saman, tverrpolitisk i Kvinnherad kommune, for å gjere alt i vår makt for å hindre at dette vert sett i verk».

Her er brevet til Fylkesutvalet i sin heilskap (mellomtitlar er lagt inn av Grenda):

Til Fylkesutvalet i Vestland:

Kvinnherad kommune har med stor uro blitt gjort kjend med at fylkesdirektøren i Vestland har føreslege å ta bort ferje II i ferjesambanda Årsnes–Varaldsøy–Gjermundshamn og Ranavik–Skjersholmane.

Bakgrunnen for framlegget frå fylkesadministrasjonen er at fylkeskommunen må spara i storleik 130 millionar kroner innan kollektivområdet.

Å halvera tilbodet på dei to største sambanda i Kvinnherad, vil ifølgje framlegget gje ei innsparing på om lag 22 millionar kroner årleg frå og med 2026, og ei innsparing på om lag 10 millionar kroner i 2025. Såleis legg fylkesdirektøren med dette opp til at Kvinnherad kommune, som er éin av 43 kommunar i fylket, åleine skal ta nærmare 20 prosent av innsparinga for heile fylket. Dette er svært urimeleg, og me stiller spørsmål ved om fylkesdirektøren i det heile har vurdert konsekvensane dette framlegget vil få for både Kvinnherad og kringliggjande kommunar.

Sjokkforslag: Føreslår å ta bort ei ferje frå både Årsnes og Ranavik

Skulle dette framlegget bli vedteke, vil det regionalt svært viktige sambandet mellom Kvinnherad og Stord bli hardast råka. Tal avgangar vert halvert, og det vert nærmare 2 timar mellom kvar avgang. Dette vil gjera det nær uråd for innbyggjarar i Kvinnherad å arbeida i andre delar av Sunnhordland, og skapa store problem for alle som treng nytta seg av regionale tenester på Stord, som til dømes sjukehuset. Kostnadane dette vil ha for næringslivet vil vera svært krevjande å bera. Konsekvensane er ikkje utgreiide.

Mange attståande bilar

Trafikken på sambandet er aukande, med om lag 600 bilar i døgeret. Viss sambandet berre skal betenast med éi ferje (som me forstår vil vera ei av ferjene som går i sambandet i dag), vil kapasiteten ikkje vera stor nok til å ta unna trafikken. Såleis vil det bli svært mange attståande bilar, som såleis må venta nærmare to timar på neste avgang.

For sambandet over Hardangerfjorden vil framlegget medføra store utfordringar for heilt naudsynte interne kommunikasjonar i kommunen som arbeidspendling, skuletransport, drift av helse- og omsorgstenester og ambulansetransport. Jamvel barnehagebarn kan verta råka. Framlegget kjem kort tid etter at fylkeskommunen ved Skyss har beklaga den svært ustabile drifta av dette sambandet den siste tida. Fylkeskommunen vedgjekk dessutan at sambandet hadde vore særleg hardt råka av kansellerte avgangar, samanlikna med andre ferjesamband i fylket. Sidan den største og nyaste ferja ikkje kan gå innom Varaldsøy grunna den gamle ferjekaien på øya, legg fylkesdirektøren truleg opp til at M/F «Lærdal» skal vera einaste ferje i sambandet. Det kan me ikkje under noko omstende akseptera. Den same utfordringa knytt til kapasitet på ferja vil også i høgste grad gjera seg gjeldande her.

Å halvera tilbodet på dei to største ferjesambanda i ein kommune med 13.000 innbyggjarar i ein region på 65.000 innbyggjarar, vitnar om manglande innsikt i det geografiske området fylkeskommunen er sett til å rå over.

Ferjeforslaget: – Den mest alvorlege trusselen mot Kvinnherad sidan 9. april

Snarleg innkorting

Fylkeskommunen kunne kanskje teke til orde for ein diskusjon om éi ferje i sambandet mellom Kvinnherad og Stord dersom den tidlegare hadde utført oppgåva den har fått knytt til innkorting av ferjesambandet. Med ei overfartstid på 20 minutt, framfor dagens 40, ville ein kanskje kunna akseptera at det går éi ferje i sambandet. For at dette i det heile skal vera aktuelt å diskutera, må det byggjast nye ferjekaiar på vestsida på Halsnøy og lenger nord på Stord. Me føresett at dersom fylkeskommunen vil arbeida vidare med reduksjonar, blir gjeve ein klår og forpliktande lovnad om snarleg innkorting av ferjesambandet finansiert med fylkeskommunale midlar innan ein kort tidsfrist.

All den tid ferjekaien på Varaldsøy ligg der den ligg, og ferja samstundes må ha beredskapsfunksjon, kan me ikkje akseptera reduksjonar på sambandet mellom Årsnes, Varaldsøy og Gjermundshamn. Sambandet er ikkje berre viktig for Kvinnherad, det er også eit viktig samband vest/aust i fylket, og ein viktig omkøyringsveg for Jondal–Tørvikbygd.

Tunnel mellom Pollane

Me vil allereie no varsla at Kvinnherad kommune vil vurdera si innstilling til andre samferdsletiltak i regionen, til dømes behandling av reguleringsplan for fv. 48 Nordrepollen–Austrepollen, til dess fylkeskommunen kan garantera for eit tilfredsstillande og føreseieleg ferjetilbod på sambanda Årsnes–Varaldsøy–Gjermundshamn og Ranavik–Skjersholmane

Kvinnherad kommune forstår at fylkeskommunen må redusera tilbodet som følgje av den økonomiske situasjonen. Men me forstår ikkje at ein såpass omfangsrik administrasjon - som me også legg til grunn at har tilstrekkeleg fagkompetanse - ikkje ser ut til å klara å følgja forvaltningslova sine reglar om forsvarleg saksutgreiing. Ein reduksjon av ferjetilbodet av eit slikt omfang som fylkesdirektøren her føreslår, kan ikkje under noko omstende effektuerast så raskt som det er lagt opp til utan at konsekvensane på alle område er grundig kartlagde.

Me har von om at også dei folkevalde i fylkeskommunen ser dette.

Svært vonbrotne

Kvinnherad kommune har vore, og ønskjer å vera, ein konstruktiv samarbeidspartnar for Vestland fylkeskommune. Me har funne gode løysingar på mange område i fellesskap. Me er difor svært vonbrotne over at dette framlegget kjem til dei folkevalde «over bordet», utan at det har vore dialog med kommunen i framkant. Me er viss på at Kvinnherad kan bidra i den vanskelege økonomiske situasjonen for fylkeskommunen, viss me blir teke med på råd under vegs.

Me forventar at framlegget blir lagt bort utan opphald, og at fylkesdirektøren snarleg inviterer Kvinnherad kommune til dialog om samarbeid for å løysa utfordringane som er oppstått. Dette til det beste for innbyggjarane og næringslivet i denne delen av fylket, men også av omsyn til fylkeskommunen sin vidare legitimitet som forvaltningsnivå.

Vegard Bjørnevik

Ordførar