Kranselag ved nyeskulen på Husnes - no er bygget tett

– Er det nokon som vil ha vegetarpizza? spør Øystein Lie Sundal frå prosjektavdelinga til kommunen medan han deler ut pizzaøskjer rundt på borda i brakka på anleggsområdet.

– No, we are all normal, kjem det kontant frå ein av arbeidsfolka, til latter frå dei andre.

Det er avslappa stemning ved kranselaget som skal markera at bygget no er tett. Byggherren, i dette tilfellet Kvinnherad kommune, vil då gje ein takk til alle som jobbar med prosjektet. Det er Svein Are Furdal som er prosjektleiar frå kommunen, men på dette kranselaget er det Øystein Lie Sundal som tek ordet.

Prioriterer tryggleik

– Svein Are berekna fødselen til ungen sin veldig bra, så han slepp å halda tale i dag, spøker Sundal før han kjem med ein takketale.

Her legg han mellom anna vekt på kor viktig det er med tryggleik på arbeidsplassen.

– Dette prosjektet har stilt store krav både teknisk og når det gjeld tryggleik. Det er viktig å passa på seg sjølv og andre, slik at alle kjem trygt heim frå jobb. Her har det blitt utført godt arbeid, utan nokon skadar på anleggsområdet, poengterer han.

Det er Consto Bergen som er totalentreprenør i prosjektet, og Sindre Handegard er prosjektleiar frå Consto. Han utbringer ein skål til alle som har jobba med skulebygget.

– Me starta arbeidet her fjerde mars, med den lokale grunnentreprenøren. Så starta betongarbeidet i juni, og byggjearbeidet kom i gang i september. No er det tredje desember og me har alt tett hus. Det synest eg er imponerande! I dag skålar me med brus, sidan det er no arbeidsdag, smiler Handegard.

Vêr og vind

Det er ikkje sjølvsagt at arbeidet alt har kome så langt som det har. Anleggsleiar Einar Lerhaugen fortel Grenda at prosessen til tider har vore utsett for vêr og vind.

– Når det er mykje kraning og mange element som skal på plass, så kan vinden gje utfordringar. Då me skulle få på plass prefabrikerte tak, var me avhengige av at det var vindstille. Nett då fekk me sjølvsagt mykje vind ei vekes tid, smiler han.

Han understrekar at det ikkje har fått nokon store konsekvensar. Prosjektleiar Sindre Handegard fortel at prosjektet har kravd mykje planlegging.

– Det er gjort mange grep i prosjekteringa for at produksjonen og samansetjinga av dei ulike elementa i bygget skal fungera bra. I dette prosjektet har me hatt høve til å prioritera tryggleiken til arbeidarane i valet av løysingar, og det er me glade for, seier han.

Humøret og profesjonaliteten

No skal bygget få tørka, før ein kan setja i gang med innandørs arbeid og montera tekniske anlegg. I dag er det rundt 35 arbeidarar på området, men Handegard fortel at når arbeidet innandørs kjem i gang, vert talet omtrent dobla. Det ser ut til at alt ligg til rette for ei god framdrift fram til bygget skal stå ferdig. Øystein Lie Sundal påpeikar dette i sin tale:

– Om litt over eitt år vil 200 elevar og tilsette flytta inn i eit bygg som skal vera ein trygg arena for læring og vekst. Bygget er alt i gode hender, det er solid handverk som vert levert her. Eg håpar at denne stunda gjev dykk eit lite pusterom til å kjenna på stoltheit over jobben som de har gjort. Me i Kvinnherad set stor pris på humøret og profesjonaliteten som pregar arbeidsplassen, og me vil takka kvar og ein, seier Sundal.