Køyr debatt!
Komande torsdag skipar LO Kvinnherad og Grenda til valdebatt på Husnes.
Grenda og LO inviterer torsdag til valdebatt i kinosalen på Husnes. Alle ordførarkandidatane som stiller til val kjem til å bli grilla i ei rekkje ulike spørsmål, og vonfullt koma med gode svar som gjev oss eit klart bilete av dei ulike partia.
Tema kjem blant anna til å vera; samferdsel, natur & miljø, heiltid/deltid, og folketalsutvikling, og ordstyrarane vert Grenda sin eigen redaktør Håvard Sætrevik og journalist Morten Nygård.
Annonse
– Eg håpar at me kan få svar på nokre ting som skil partia, og bli endå litt klokare på kva parti som er det rette. Me håpar på ein god og konstruktiv debatt der politikarane får tid til å fortelja om korleis dei vil forma framtida til Kvinnherad, seier redaktør Sætrevik om kva han håpar på i forkant av debatten.
Spørsmål
Debatten er open for alle som vil koma og nyta lokalpolitikk i full utfalding, anten i fysisk eigen person som sjåar i salen, eller gjennom skjermen via livestrømming på GrendaTv (grenda.no).
Det vert også opning for at publikum kan få stilla eigne spørsmål, anten frå salen eller på førehand ved å senda ein epost til haavard@grenda.no eller morten@grenda.no.
