Koste seg med julefrukost i skogen

Om ikkje solsikkene og blåklokkene i Bringedalsbygda barnehage hadde nok julestemning frå før, så fekk dei i alle fall det måndag morgon. Då tok nemleg barnehagebarna med seg frukosten ut i det fri, på den julepynta stien i Stigen i Herøysundet.

– Vi hadde lyst å eta frukost saman her i lyset når det var mørkt ute. Så då kasta vi oss rundt. Så gjer vi det også litt for å få skikkeleg julestemning før jul, seier Heidi Uppheim i Bringedalsbygda barnehage.

Jul i fokus

Med kvar sin matboks på fanget og ein kakaokopp i handa, fekk barnehagebarna ein strålande start på måndagen.

– Dette er veldig gøy. Spesielt gøy er det å få kakao på morgonkvisten, seier skulekameratane Kiara, Kristi, Olea og Tobias.

Dei fire venene skal begynna på skulen etter sommarferien, og gler seg stort til det. Men det dei gler seg aller mest til er denne måndagen berre fire dagar unna.

– Om fire dagar så skal eg til mormor, seier Kristi før ho held fram:

– For då er det julaftan. Og vi skal feira hos mormor.

– Det er berre fire dagar til jul. Eg gler meg kjempemasse, skyt Olea inn.

– Det gjer eg òg. Og no har eg berre ein dag igjen i barnehagen før det er juleferie, smiler Kiara.