Koseleg familiedag på Sæbøvik

Sæbøvik Vel inviterer til løp og andre aktivitetar på Nyamyro på Sæbøvik 6. oktober. Inntekta går til Barnekreftforeningen, og det er påmelding alt 22. september.

– Det kjem til å bli ein koseleg familiedag, seier Merethe Normann i Sæbøvik Vel.

«Løp for meg» er eit innsamlingsløp i regi av Barnekreftforeningen, og blir vanlegvis lagt til september for å markera den internasjonale barnekreftmånaden. I år er det også løp i oktober månad, sidan Barnekreftforeningen er mottakar i TV-aksjonen i år. Det var Lene Lande som tok initiativ til arrangementet på Halsnøy, og dette er første gongen løpet føregår i Kvinnherad. Arrangørane fortel at det ikkje vil vera eit konkurranseløp.

– Nei, det blir ikkje tidtaking på Nyamyro denne søndagen. Dei minste kan springa ein runde på banen, dei litt større kan ta to rundar. Dei spreke kan hiva seg på eit løp over Heio, fortel Normann.

Etterpå er det lagt opp til litt ulike aktivitetar på grasbanen, leikar og spel.

– Me er veldig heldige og har fått sponsorar nok til å kunna servera gratis pølser og saft, og det blir medalje og panneband til alle påmeldte, fortel Normann.

Dersom ein ikkje vil vera med på løpet, kan ein likevel koma og bli med på dagen, og ein kan sjølvsagt gje ei gåve til Barnekreftforeningen utan å springa. Pengane går til å oppretta familiehus ved dei fire store universitetssjukehusa i landet. Desse husa kan gjera at familiar med eit kreftsjukt barn slepp å bli splitta i dei periodane barnet må vera på sjukehus.

– Ein melder seg på på spleis.no, og då må ein også skriva inn namn på deltakarane. Det er eit veldig godt formål, så me håpar på mange påmeldte, avsluttar Merethe Normann.