Kortare vaksineintervall for dei som skal studere eller avtene verneplikt

Kvinnherad kommune har i dag, tysdag, kome med ei oppdatering på vaksinasjonsprogrammet som gjeld framover.

Her informerer dei, gjennom sine «kjekke og dyktige sjukepleiarar», om at intervallet mellom første og andre vaksinedose er kortare for dei som skal studere eller starte førstegongsteneste, enn norma som elles er på seks veker i Kvinnherad.

– Dersom du skal studera i inn eller utland, eller skal avtena verneplikt så tek du kontakt med koronatelefonen for å avtala vaksinering snarast, oppmodar dei.

Dei dette gjeld må samstundes hugsa å minne om at dei skal ha kortare intervall då første vaksinedose blir gjeve, slik at det allereie då kan leggjast til rette for at dose to vert sett til fastsett tid.

Registrering for vaksinasjon

I meldinga vert det dessutan understreka at alle som vil ta koronavaksine må registrera seg på nett. På heimesidene til kommunen ligg lenkja ein må nytte for å registrere seg. Rekkjefølgja på dei som vert kalla inn til vaksinering er prioritert etter alder, og per i dag er det aldersgruppa mellom 55 og 64 år som vert vaksinert. Dei som har registrert seg for vaksinering får ein sms når det er deira tur i køen.

Det er også mogleg å setje seg på venteliste og få tilbod om vaksine dersom det er vaksinedosar til overs på vaksinasjonsdagane. Dette blir gjort gjennom den same lenkja.

Kommunen stadfestar at alle som har underliggjande sjukdom no skal ha fått avtale om vaksine, og minnar om at alle spørsmål om vaksine skal framleis rettast til koronatelefonen. Telefonen er open alle kvardagar mellom 08 – 10 og frå 13 – 14.30.