Koronatiltaket som fekk hjul å køyra på

Dei heile starta i 2020 då verda stod på hovudet og heile Norge måtte tenkja annleis i høve den tradisjonelle 17.-mai-feiringa. I dei fleste bygder både kommunen og landet rundt dukka det opp lange og korte bilkortesjar i alle fargar og fasongar.

For dei fleste forsvann dette innslaget så fort tiltaka og restriksjonane tillèt det, men i Omvikdalen såg dei annleis på det. Dei omfamna kortesjeinnslaget og ein ny tradisjon var såleis fødd.

– Det er jo gøy at det framleis er ein slager her inne. Det var jo mange som hang seg på dette med bilkortesjar under koronaen, men dei aller fleste plassar har det daua ut og gått tilbake til den gamle tralten med vanleg tog og is etterpå. Så det er jo litt stas at dei har klart å halda liv i kortesjen her, seier årets leiar for kortesjen Jostein Vågen.

Ekstra innsats

På spørsmål om kva det er som gjer at akkurat Omvikdalen har klart å halda tradisjonen ved like må han tenkja seg litt om.

– Det er eit godt spørsmål, men det er jo ei landbruksbygd med mange entreprenørar, traktorar og lastebilar. Dei har tilgang på mykje forskjellig som kan vera med, i tillegg så må det jo også vera folket som ynskjer å visa fram og leggja inn den ekstra innsatsen med å pynta og gjera stas på det, understrekar Vågen.

– Folk stiller med det dei har. Det kan vera alt i frå gamle Corollaer til strøkne Mercedesar, i tillegg til nye og gamle lastebilar og traktorar. Det er i alle fall stor flagg og bjørkerisfaktor på det meste, legg han til.

Kortesjedeltakarane får ikkje berre sjansen til å syna fram køyretøya sine, det vert også premiering for beste og finaste innslag.

– Oppe i krysset på Landa vert det sett opp ein vakt og ein fotograf som tek bilete av alle. Etterpå er det eit dommarpanel som vel ut vinnarane frå 1.- til 4.-plass, fortel Vågen.

– Akkurat kva premiane blir i år har eg ikkje oversikt over, for det delegerte eg til nestleiar Runar Tvedt. Men tidlegare år har det i alle fall vore ganske bra premiar, forsikrar han avslutningsvis.