Koronasmitten går ned – men i haust kan nye virusvariantar gi nye smittebølgjer
I følgje FHI er koronabølgja i sommar framleis i svak nedgang. Situasjonen er framleis uføreseieleg, og i haust kan eventuelle nye virusvariantar gi nye bølgjer.
Publisert
Sist oppdatert
– Situasjonen er framleis uføreseieleg, og me må rekna med at epidemien veks igjen når befolkninga kjem tilbake til kvardagen etter sommaren. Utover hausten kan eventuelle nye variantar med auka spreiingsevne gi nye bølgjer, skriv Folkehelseinstituttet i sin vekesrapport for veke 31 og 32.
Helseinstitusjonane må ha beredskap for fleire innleggingar for utbrot og for større sjukefråvær, informerer dei.
Annonse
Oppfriskingsdose
Kommunane tilbyr ein oppfriskingsdose, ein fjerde dose, til sjukeheimsbebuarar og alle som er 65 år eller eldre. Fleire grupper kan bli aktuelle snart, skriv dei.
Frå veke 26 til veke 31 har det vore ein nedovergåande trend i talet på nye koronapasientar på sjukehus. Denne veka er det likevel registrert 10 prosent auke samanlikna med veka før, men talet er likevel lågare enn nye pasientar registrerte i veke 30.
Førebels er det rapportert om 192 nye pasientar i veke 32, etter 174 i veke 31, og 227 i veke 30.
