Korleis har du det?

Kvinnherad deltek i undersøkinga, som vonleg vil gje kommunen ny og unik lokalkunnskap om korleis innbyggjarane her har det. Resultata frå undersøkinga vil bli viktige verktøy i arbeidet med å skape gode lokalsamfunn og nærmiljø, heiter det på kommunen sin nettstad.

«I desse dagar får mange av kommunen sine innbyggjarar SMS eller e-post med invitasjon til å delta i Folkehelseundersøkinga i Vestland. Dine svar er viktige og vil gje ny og unik lokalkunnskap om korleis vi har det», informerer kommunen.

Dei som får invitasjon til å delta blir tilfeldig trekt frå folkeregisteret. Her i kommunen vil 25% av den vaksne befølkninga bli invitert, noko som tilseier om lag 2600 personar.

God folkehelse - utgangspunkt for eit godt liv

Spørsmåla som kan ventast for deltakarane omhandlar helse, trivsel, livskvalitet og andre forhold som har betydning for folkehelsa. Når det gjeld folkehelse slår kommunedirektør Ragnhild Bjerkvik eit slag for kvardagstrimmen.

– Ei god folkehelse er eit godt utgangspunkt for eit godt liv. Vi treng både ei god fysisk helse og ei god mental helse. Etter to år med pandemi er det viktig å få oversikt over korleis innbyggjarane våre har det, seier ho til Kvinnherad kommune, og held fram:

– At kvar og ein av oss brukar kroppen i alle daglege aktivitetar og unngår passivitet. Men vi treng òg sosiale møteplassar for å ivareta heile mennesket. Vi vil skapa gode lokalsamfunn og treng alle sine bidrag for å få dette til. Denne undersøkinga vil gje eit godt bidrag for å få på plass gode tiltak.

Til sist melder kommunen om at tolv av dei som deltek kan venta seg ei huggeleg helsing.

«Tolv heldige deltakarar blir trekt ut til å vinne universalt gåvekort – to på kr 2500 og ti på kr 1000. Gåvekorta er gyldig i fem år.» heiter det.