Kor er dei unge kulturutøvarane frå Kvinnherad?

Dei nominerte i denne runden, som hadde søknadsfrist 2. desember 2021, er mellom 18-25 år og utøvarar innan kunst og kultur. Kategoriane ein kan delta i er dans, musikk, sirkus, skapande skriving, teater, visuell kunst og open klasse.

48 av dei 400 unge kulturutøvarane som er nominert kjem frå Vestland. Kvam, Ullensvang og Stord er blant kommunane som har fleire talent som kan bli ein av femti vinnarar av draumestipendet, som i år er på 30.000 kroner.

At det ikkje finst ein einaste ung kunst- eller kulturutøvar frå Kvinnherad på nominasjonslista, tyder ikkje at slike ikkje finst. Rektor i Kvinnherad kulturskule, Kirill Zimin, avklarer kva grunnen til dette difor kan vera.

– Vi har ikkje fått inn nokon søknader frå unge utøvarar i Kvinnherad, og heller ikkje informasjon om søkjarar frå kommunen, melder han.

Skal synleggjera kommunane sitt arbeid for unge kunst- og kulturutøvarar

Totalt skal 1,5 millionar kroner bli fordelt.

– Stipendet skal gi verdifull inspirasjon og anerkjenning, og bidra til at mange unge kunst- og kulturutøvarar får oppfylt sine draumar. Stipendordninga skal også bidra til å synleggjera kommunane sitt arbeid for unge kunst- og kulturutøvarar, informerer Drømmestipendet på nettstaden sin.

Drømmestipendet er ordning som vart oppretta i 2004, som eit samarbeid mellom Norsk Tipping og Norsk Kulturskuleråd. Fleire av landets dyktige utøvarar har fått stipend gjennom denne. Mellom anna står både Astrid S, Ingebjørg Bratland og Didrik Solli Tangen på lista over tidlegare mottakarar.

Tobias Lamberg Torjusen frå Rosendal har også namnet si på denne lista, då han var ein av dei heldige stipendmottakarane i 2015. Bror hans, Sebastian Lamberg Torjusen, fekk stipend i 2010. I 2009 mottok Morten André Ersland stipendet, medan Rebekka Attramadal var ein av mottakarane i 2007.

Fleire utøvarar frå Kvinnherad har også vore blant dei nominerte.

Får «Drømmestipendet»

Juryen som skal vurdere dei 400 nominerte utøvarane vert leia av Trygve Skaug, og består av totalt 21 personar innan ulike deler av kunst- og kulturfeltet. Søknadane blir vurderte både av ein fagjury og ein draumjury. Draumar og ferdigheiter blir vekta likt i vurderingane.