«Konstruktivt innspel» til politikarane
Aksjonsgruppa «Nei til vindkraft i Kvinnherad» har sendt ut eit brev til dei politiske partia i kommunen. I det kjem dei med ei oppmoding om kva politikarane bør ta stilling til i valprogramma sine framføre kommunevalet i 2023.
Publisert
Aksjonsgruppa håpar kommunestyret blir ved avgjersla som førte til at først formannskapet og seinare kommunestyret den 29.08.19 einstemmig bad OED om at Kvinnherad vart teken ut av den nasjonale rammeplanen for vindkraft.
Brevet er også lagt ut på Facebook. Her kjem det fram at aksjonsgruppa har tru på vidare politisk støtte i kampen mot vindkraft i Kvinnherad.
Annonse
– I Kvinnherad er me heldige med politikarane våre! Dei høyrer på den store folkelege motstanden mot vindkraft i kommunen vår. Hausten 2019 sa eit samla kommunestyre at det var heilt uaktuelt å etablera vindkraft i fjella i Kvinnherad, skriv aksjonsgruppa der, og legg til at dei oppmodar politikarane til å vera like soleklare inn mot kommunevalet 2023.
Gjennomslag for folkevilja
Fram mot valet vil aksjonsgruppa ha fokus på korleis dei lokale politiske partia profilerer seg i saka. Dette kjem fram i brevet, som elles argumenterer for at det ligg eit stort folkeleg engasjement bak standpunktet dei legg fram.
«På bakgrunn av det store folkelege engasjementet mot vindkraft og eintydige politiske signal om det same vil vi sterkt oppmoda om at eit tydeleg nei til vindkraft i Kvinnherad blir tatt inn i partia sine valprogram, slik at folkevilja på demokratisk vis får gjennomslag i ei sak som betyr særs mykje for mange av kommunen sine innbyggjarar.»
Annonse
Brevet, som blir omtala som eit konstruktivt innspel til det politiske arbeidet i forkant av lokalvalet 2023, er signert Aksjonsgruppa «Nei til vindkraft i Kvinnherad», ved Annemor Ekeland, Sven Løkeland, Mari Teigen Varanes, Mona Vetrhus, Åge Bjørsvik, Astrid Døssland og Rolf S. Ask.
