Konstituert i eit kommentarfelt på Facebook, no riggar dei for Bergensopprøret

– Det er ei utruleg viktig sak. Desse høge prisane går ut over folk flest, og ikkje minst dei som har det verst. Det råkar bedrifter òg, berre sjå på Elin som ikkje kan invitere til julebord på Perla i Uskedalen denne sesongen fordi straumen er for dyr. Det er trist!

Astrid Døssland, som no er busett i Bergen, er tydeleg oppgitt.

I lag med tre andre planlegg ho i desse dagar demonstrasjonen mot dei høge straum-, mat- og drivstoffprisane, som finn stad på Torgallmenningen i Bergen 6. oktober.

– Hjelp skal du få!

Døssland har vore engasjert i vindkraftsaka i fleire år, men tilfeldigheitene førte til at ho òg vart engasjert i det som no har fått namnet «Bergenopprøret».

– Eg pleier ikkje kommentera så mykje på Facebook, men i fjor haust las eg i kommentarfeltet under eit innlegg i gruppa «Vi som krever billigere strøm». Der var det ein som spurte om det ikkje skulle vera demonstrasjon i Bergen, kor ein annan svara positivt, men då trong han hjelp. Så vart eg impulsiv og svara «Ja, men hjelp skal du få!». Og slik gjekk det til, forklarar den engasjerte pensjonisten blidt.

Dei to andre i arrangørgruppa kom til på same viset, i kommentarfeltet på Facebook, og firkløveret har funne seg til rette med kvar sitt ansvarsfelt i samband med aksjonen. Uskedelingen har ansvar for appellane.

Mange gode appellar

Bergenopprøret har fått undertittelen «Demonstrasjon mot de høye strøm-, mat- og drivstoffprisene» på Facebook. Og i løpet av dei to timane demonstrasjonen går føre seg blir det lagt opp til ei rekkje appellar.

– Alle namna er ikkje klare enno, men det kjem folk frå organisasjonar og det frivillige som skal fortelje kor skoen trykkjer for dei som har minst, det blir politiske appellar frå lokalt og sentralt nivå, nestleiar i energikomiteen Sofie Marhaug kjem, og ein representant frå Nei til EU er blant dei som stiller. Eg trur me får mange gode appellar, slår Døssland fast.

Dette blir den andre demonstrasjonen dei fire eldsjelene arrangerer. Den første vart gjennomført 20. januar, og då til overraskande god oppslutnad meiner Døssland.

– Då kom det frykteleg mykje folk. Sjølv om det var kaldt og midt på vinteren, var det over 1000 personar som samlast på Torgallmenningen. Det kan jo vera hufse i oktober, men me håpar vêret blir bra og kryssar fingrane for at det kjem mange denne gongen òg, seier ho optimistisk.

Udemokratisk straumforvalting

I dagane før Bergensopprøret er ho mellom anna aktiv på Facebook, og deler informasjon om hendinga der ho kan. Så kor kjem dette engasjementet frå?

Døssland medgir at ho kjenner konsekvensane av dei høge prisane på straum, mat og drivstoff på kroppen.

– Hjartesaka mi er jo vindmøllene, men desse utanlandskablane syg krafta utav heile Sør-Norge. Dei køyrer på med fornybar energi med valdsamt trykk, men forvaltinga av straumen er ikkje demokratisk lenger, sluttar ho.