Kommunestyret med støtte til ordføraren – og alle vil ha lang tunnel

Då ordføraren heldt si orientering til kommunestyret torsdag føremiddag, var saka om trafikksikring og tunnel mellom Nordrepollen og Austrepollen, også kalla poll til poll-tunnel, eit uunngåeleg tema.

Fleirtalet av dei som tok ordet gav full støtte til ordføraren si handtering, oppmoding om å mildna ordbruken i den offentlege debatten og ønske om lang tunnel mellom pollane.

Tunnel mellom pollane

Ordførar Hilde Enstad oppdaterte kommunestyret ved mellom anna å lesa vedtaket frå 2019, som framleis er det gjeldande vedtaket til Kvinnherad kommune. Ho gjorde også greie for status no, som i tillegg til det mykje omtala oppstartmøte 6. februar inkluderer tett kontakt mellom kommunen og fylkeskommunen sine planavdelingar.

Ho opplyste også om at det kunngjort planarbeidstart på kommunen si heimeside 22. februar.

– Det må arbeidast vidare med oppgradering av vegen mot Furebergtunnelen, og eg håper at fylkeskommunen held sine forpliktingar til det. Det får vera opp til kommunestyret om dei då er nøgde med at planarbeidet er starta opp, eller om ein skal gjera meir med det, slutta Enstad.

Ove Lemicka (Frp) var første til å ta ordet etter orienteringa.

– Eg meiner at sjølv om det har vore støy, så har ordførar og varaordførar har gjort det som kommunestyret har vedtatt. Eg stiller meg undrande til at det har blitt eit slik køyr på vår øvste valte leiar, og eg syns det er problematisk at fylkesordføraren har pressa på for at armen mellom Seljestad og Bergen skal gå gjennom Jondal og over Kvamskogen. Det er ikkje ei god løysing å velja den lengste løysinga, som også er den dårlegast for Kvinnherad. Vegen skal bli trygg, men me må la utgreiingane gå til vegs ende før ein vel løysing, sa Lemicka.

Utfordra Sp på Sunnfast

Øyvind Lernes (H) følgde sporet til Lemicka.

– Eg ser ikkje at ordføraren har gjort noko anna enn å følgja opp kommunestyrevedtaket frå 2019. Ein kan jo få inntrykk av at dette er noko som skal byrjast på i morgon. Nasjonal transportplan (NTP) seier at rassikringa er påtenkt gjort i 2027-2033. Førebels ser det slik ut. På bakgrunn av det blir det uforståeleg at det blir ein slik hardna debatt, og eg må oppmoda om at debattklimaet blir betre. Det må vera råd å jobba for to ting samtidig, sa Lernes.

Han sa vidare Furebergtunnelen er ikkje trafikksikker slik han er no, og peika blant anna på at det er sider ved den tunnelen som gjer brannsikring vanskelegare der enn det er andre plassar.

– Det som er litt interessant å sjå at det er politikk i dette, og spesielt i Senterpartiet ser det ut til at dei ikkje støttar Sunnfast. Det ville vore greitt å fått avklara kva syn Senterpartiet har i denne saka, utfordra Lernes.

Jostein Saghaug (MDG) fann det problematisk å kopla trafikksikringa opp mot Hordfast og Sunnfast.

– MDG er i mot å øydeleggja natur med store samferdsleprosjekt, konkluderte Saghaug.

Sova trygt?

Øyvind Hardeland (Ap) hadde sendt inn ein interpellasjon om poll til poll-tunnel, ein interpellasjon som seinare har blitt omjustert til eit spørsmål.

– Det er nokre innbyggjarar som bur der inne. Kor skal tunnelen koma ut? Bygda har ytt til kraftutbygging, og dei kan ikkje bli ein trafikkmaskin, der ein tar dyrka mark og øydelegg strandlinja. Eg veit alle seier ein kan koma tilbake til det, men me kan seia i frå no om korleis me vil ha det, meinte Hardeland.

Knut Johannes Helvik (H) stod på at ein ikkje kan behandla og gjeta ei slik basert sak på ein interpellasjon, men la til at Høgre er for lang tunnel.

– Då reknar eg med at eit ord er eit ord, og då kan eg sova godt om natta. Men eg er ikkje heilt sikker, svarte Hardeland i ein replikk.

Synnøve Solbakken (Ap) konkluderte med at vegsaker engasjerer meir enn det meste anna.

– Denne saka har tatt heilt av. Alle kan meina noko om kva som er best for Kvinnherad. Uheldigvis er bygdene sett opp mot kvarandre her. Ap er for Sunnfast, men Sunnfast kan ikkje prioriterast før ein trygg veg i mellom pollane. Ordføraren har ikkje noko anna val enn å forhalda seg til vedtaket frå 2019, til dess denne salen har vedtatt noko anna, sa Solbakken.

Gryteklart prosjekt

Gunnar Våge (Sp) var ikkje like trygg som Hardeland.

– Når eg høyrer på det som er sagt til no i dag, så føler eg at me burde hatt ei sak på denne tunnelen i dag. I den saka som har florert no, blir vist til saka frå 2019. No har det oppstått ein heilt ny situasjon i denne saka, og det er den me må ta innover oss. 2019-vedtaket var eit godt vedtak då. Fylkeskommunen har ein pott med rassikringsmidlar som dei vil bruka no. Det er viktig at dette prosjektet blir regulert og er gryteklart når pengane skal løyvast, påpeikte Våge.

Han tok i mot utfordringa frå Øyvind Lernes, og svarte at Senterpartiet har gått inn for Sunnfast heile tida.

– Å dra det inn i poll til poll-diskusjonen er meiningslaust. Det er ikkje rassikringsmidlar som skal nyttast på Sunnfast, slutta Våge

Øyvind Lernes tok replikk til Våge.

– Planarbeidet er i gang, det er iverksett. Me kan godt ha ein brei debatt om 2019-vedtaket, men me kan ikkje ha ein samferdslestrategi meisla ut av ein interpellasjon, meinte Lernes.

Synnøve Handeland (V) oppmoda til roa ned debattklimaet «i desse sakene».

– Det heng ikkje på greip å gå på personangrep og mistenka dei (ordførar og kommunestyremedlemmer, journ.merk) for underliggjande agenda. Tusen takk ordførar for at du har stått i det. Eg syns det er bra at eit samla kommunestyre har stått på talarstolen og støtta vedtaket frå 2019, sa Handeland.

Vil rassikra

Gaute Lund (SF) gjorde som Handeland og takka ordføraren for arbeidet og handteringa.

– Vestlendingar blir engasjerte i samferdsle. Eg vil rosa kommunen for at planarbeidet er starta. Når det gjeld interpellasjonen til Hardeland, ville det ikkje vore forsvarleg å hiva denne saka inn på saklista uførebudd, la Lund til.

Hardeland nytta seg av replikkretten til å belysa kor viktig retten til interpellasjonar er, og kva dei skal brukast til, utan at det hadde synberr effekt på forsamlinga.

Marit Årthun (Krf) trudde alle kommunestyret var for å rassikra og byggja tunnel frå poll til poll.

– Eg syns også at det er viktigare med trygg veg enn store samferdsleprosjekt, la ho til.

Torgils Våge (Sp) fekk siste ordet i meiningsvekslinga.

– Eg syns klimaet i saka har mildna etter ordføraren si orientering her i dag. Samtidig forstår eg at dette har engasjert maurangerfolket, slutta Torgils Våge då debatten ebba ut.