Kommunen har overtatt storstova – no står berre innspurten igjen

– Me byr på ein open dag 20. april, med offisiell opning og ordførar, Elsie Bay, turngruppa, handballgruppa og kanskje fleire. Og det skal lukta nysteikte vaflar i heile arenaen. Barna får sjå breidda i bygget, annonserer dagleg leiar for Kvinnherads Arena Daidalos Dahle.

Kvinnherads kommune har no overtatt den nye storstova

– Me har overtatt med mangelliste, og det er minst 14 dagar til me er i mål. Det er mykje som gjenstår, men det er utruleg deilig å koma inn her, seier Dahle med ettertrykk.

– Fett!

– Mange rutinar som skal på plass, og me skal bu oss inn. Det blir vanvettig fett dette, brummar Daidalos Dahle godlynt.

Tysdag hadde han invitert Grenda og Kvinnheringen til ei lita synfaring, nærast som ein generalprøve før PTM-utvalet skulle få same runden. Det er eigentleg berre å gle seg for liten, middels og stor, for her blir det mykje å ta seg til.

Hovudflata på 50 gonger 50 meter er streka opp til ei rad ulike idrettar, men Kvinnherad Arena sluttar ikkje der. Klatrehallen byr på 13 meter vegg rett til vêrs. Aktivitetssalen kan nyttast til både kampsport og aerobic – og heilt sikkert meir til. Og i tillegg til ei 60 meter lang sprintstripe på galleriet kjem basishallen, med trampolinar og skumgummigrop.

– Eg har hatt sju månader på rådhuset, men no byrjar den meir praktiske retninga av jobben her i arenaen. No må me testa alt, slik at me får vita at det fungerer godt før me opnar hallen opp for alle. Det betyr at trenarar og lærarar også må inn og testa huset, og ein må ha ein dugnad for å forflytta utstyr, kommenterer Dahle.

Skulane blir av dei første som slepp inn. For elevane ved Undarheim skule og Husnes ungdomskule må dette vera som å koma til himmelen når ein veit kva lokale dei har delt på fram til no.

Testar kapasitet

Dahle er tydeleg på at hans ansvar byrjar når dei opnar dørene, og for det som skjer framover i tid. At kommunen har erklært at Kvinnherad Arena er ei storstove for heile Kvinnherad forpliktar, meiner arenasjefen.

– Det skal skje noko her også for dei som ikkje er etablerte brukarar av ein idrettshall. Då må me treffa andre. Til hausten får me til eit større, folkeleg konsertarrangement her, både for å testa ut hallen og femna om fleire, forklarer Dahle.

Det han kallar «ordinær drift» startar når skuleåret 2023/24 startar.

– Eg har gitt vekk mest all treningstida, men den er testbasert no framover. Bjørn Røssland og eg må ha timar her utan aktivitet for å justera bygget og belastninga, seier Dahle.

Blant anna må dei få testa kva mengde menneske som garderobesystemet toler at er i sving samtidig.

– Kan me ha fullt i aktivitetssalen, i basissalen, på idrettsflata og i møteromma utan at det går på kostnad av noko? Det er mange steg me må gjennom slik at me kan etablera gode og ryddige forhold for idrettslaga og skulane. Korleis får me alle mest mogeleg ut av dette? spør Dahle for å illustrera kva testperioden skal gje dei svar på.

Tryggleik

– Når klatrehallen og basishallen er i bruk, må nokon ansvarlege vera til stades. Det er høg skaderisiko på slike «flater», så det kan ikkje vera fritt bruk der. Me kan ikkje gå på kompromiss med tryggleiken, seier Dahle.

Han reknar med at det tar noko tid å etablera desse ordningane.

– Eg er berre éin fyr, og eg kan ikkje vera her i alle timane i veka og helg. Det blir litt opp til kven som tar initiativ, legg han til, og trur at turngruppa er blant dei som vil koma til å ha nokre opne dagar i basishallen, som eit rekrutteringstiltak.

Setekapasiteten førebels på 1225 når alle tribunane er trekte ut. Når ein tar i bruk golvflata også, blir publikumskapasiteten på ein konsert fint 3000. Dahle har absolutt ambisjonar om fylla arenaen med slike publikumstal, og han veit at han då må treffa breitt med arrangementa.

– Skal me få dette til, skal me lukkast med Kvinnherad Arena, så må det vera eit bygg som er heile Kvinnherad sitt og som alle har eit eigarskap til, sluttar Dahle.