Kommunen har kome med E39-uttale
Ordførar Hans Inge Myrvold har kome med uttale til reguleringsplanen til E39 Stord-Os.
Med bakgrunn i at ny E39 Stord Os har betydeleg betydning for Kvinnherad kommune, har ordførar Hans Inge Myrvold kome med eit høyringssvar på oppstartsmelding for detaljreguleringa.
Artikkelen held fram under annonsen.
– Vi har over lang tid arbeidd for ei generell innkorting av dagens påkopling mot E39 på Stord. Situasjonen med ferje mellom Ranavik og Skjersholmane har lang seglingstid og er ein uhaldbar situasjon for kommunen. Det har vore gjennomført eit stort arbeidd med blant anna fylkeskommunen og Stord kommune i å koma opp med betre alternativ for fjordkryssing med ferje, skriv Myrvold innleiingsvis i sin uttale.
Vidare peikar han på at Kvinnherad ynskjer å retta fokus på Sunnfast.
– Stord, Kvinnherad og Tysnes har samla seg i arbeidet med ny Sunnfast. Det vil gje oss ei ferjefri påkopling til E39, som er det føretrekte alternativet av dei alle. Eit Sunnfast-prosjekt vil gje oss bruløysing over Kvinnheradfjorden, mellom Sunde, Huglo og Skorpo. Summen av dette gjer det viktig for oss å sikra at kryss på «Økland-Tysnes» er planregulert slik at trafikk frå ein slik samferdslestruktur som beskrive gjer god vegløysing frå Hodnanes på Tysnes, skriv ordføraren.
Vil bli høyringspart
Det er særleg påkoplinga til kryss på «Agdestein-Stord» ordføraren meiner vil ha avgjerande betydning.
– Eit nytt ferjestø på Stord vil vera hensiktsmessig at ligg på austsida av Stordøya, i området Buvika og Rommetveit. Det desidert beste framtidige ferjesambandet mellom Stord og Kvinnherad bør gå mellom Stord, så Buvika, Kvernaneset, Sævarhaugen eller Valevågen og Halsnøy, då på Ranavik, Klosterneset eller Sæterneset. Det nest beste alternativet vil vera mellom Sævarhagen eller Valevågen og Sunde, skriv Myrvold.
Avslutningsvis bed han om at Kvinnherad kommune får vera høyringspart i det vidare reguleringsplanarbeidet med ny E39 Stord-Os.
– Og vi vil gjerne koma i dialog knytt til framtidige påkoplingar for Kvinnherad kommune, og vår samferdslestruktur vidare, står det å lesa i uttalen.